La XDLA pide a les alministraciones que sigan les recomendaciones del Conseyu d’Europa

El tercer informe del Conseyu d’Europa sobre’l cumplimientu de la Carta Europea de Llingües Minoritaries recomienda una proteición llegal mayor al asturianu. La XDLA encamienta al Gobiernu y a la Xunta Xeneral a que tomen nota.

Cuatro años depués de la espublización del segundu informe, la situación no que respeuta a la proteición llegal del asturianu mantiénse igual. Esto ye, nin los gobiernos que tuvo’l país nesti tiempu nin la Xunta Xeneral fixeron casu a les recomendaciones llanzaes pol Comité d’Espertos del Conseyu d’Europa en materia llingüística. “Mentes qu'al Executivu socialista de Patxi López lu emponderen dende Estrasburgo y lu ponen como modelu a siguir nel ámbitu español, el Gobiernu d’Asturies, tamién en manes del PSOE, recibe un tirón d’oreyes por nun dar pasos alantre col reconocimientu de los derechos llingüísticos de los falantes. Mesmamente, al lleer l’infome pue vese cómo en política llingüística tamos dando pasos atrás cola sida de la crisis económica”, espliquen dende la Xunta pola Defensa de la Llingua Asturiana (XDLA).

El coleutivu ciudadanu amuesa’l so malestar pol enfotu nulu del Gobiernu n’apurrir datos al Conseyu d’Europa sobre l’asturianu. Asina, l’informe señala qu’Asturies, pese al pidimientu del organismu, nun treslladó’l númberu de falantes del nuesu idioma “cuando esisten estudios sociollingüísticos sobre Asturies que muestren que nel 2002 esistía un 20 por cientu de falantes y que’l 60 por cientu de la población taba a favor de la oficialidá”. Al respeutu, la XDLA encamienta al Executivu a la ellaboración d’un estudiu nuevu “que permitiera que, pal cuartu informe, el Conseyu d’Europa contara colos datos más afayadizos”.

Amás, destaca qu’otros datos espublizaos pol informe, con allabancies por parte del Conseyu d’Europa, son falsos. Asina, el documentu cifra’l númberu de servicios de normalización en 18 nel momentu d’ellaboración del informe cuando nunca llegó a haber un númberu tán altu –anguaño furrulen 14–. Nesi sen, tampoco nun recueye la mengua perimportante nes subvenciones que reciben estos servicios dende’l 2008. La presencia nos medios de comunicación y la educación son otros puntos qu’analiza l’informe, que reclama la necesidá d’aprobar la especialidá d’asturianu. Por último, destaca la creación de la Unidá de Traducción que, recuerda la XDLA, vieno al traviés de los tribunales y non por iniciativa del Gobiernu.