La XDLA nun descarta otra movilización pola oficialidá a lo primero del añu 2022

Mentanto nun lleguen novedaes na negociación sobre la reforma del Estatutu, la Xunta pola Defensa de la Llingua Asturiana (XDLA) va entamar aconceyamientos con diferentes organizaciones pa valorar una movilización nueva pola oficialidá a lo primero del 2022. El coleutivu pide a los partíos la eliminación de llinies coloraes de cara a un alcuerdu.

“Como yá anunciemos, la manifestación del 16 d’ochobre pasáu pue que nun vaiga ser la última demostración de puxu de la demanda de la oficialidá. Nes selmanes vinientes, a la vista de les novedaes que se conozan, la XDLA cunta entamar contactos con organizaciones polítiques, sindicales y sociales pa estudiar la posibilidá d’otra movilización”, espresa la XDLA, que reclama al Gobiernu y a la FSA “entamar yá la reforma del Estatutu d’Autonomía, proponiendo una redacción nueva del artículu cuartu que reconoza al asturianu y al gallego-asturianu como llingües oficiales”, y al restu de fuercies favoratibles “que se sienten a negociar esa redacción, ensin poner rayes coloraes, ensin condiciones previes y ensin vetos”.

En concreto, diríxese a Foro, que marcó como irrenunciable la esixencia de trés quintos p’aprobar y modificar la norma que desendolque la oficialidá. “Ye una arbitrariedá ensin xustificación”, considera la XDLA, que califica de “inaceptable que s’entregue a una minoría de 19 del total de 45 representantes de la cámara la opción de vetar cualquier desenvolvimientu reglamentariu de los términos en que se tien que traducir la situación d’oficialidá. ¿Qué problema hai con qu’una llei de normalización la decida una mayoría de la cámara y cuatro años depués otra mayoría la matice, la ameyore o la cambie dafechu?”.

El coleutivu tamién llama “a la prudencia dientro’l movimientu de reivindicación llingüística, sobre manera a les organizaciones sociales y entidaes culturales que puen vese tentaes d’apoyar yá de mano limitaciones a los nuestros derechos por entender que ye meyor una oficialidá amenorgada a nun llograr avance nengún nesta llexislatura. La reivindicación d’una oficialidá con toles lletres nunca va torgar que se llogre. Si lleguemos equí ye porque nunca abandonemos esa reivindicación, nin siquiera cuando nun había nengún diputáu a favor. Muncho menos agora qu’hai mayoría”.

“La capacidá y la responsabilidá de poner enriba la mesa’l primer borrador pa entamar eses negociaciones ye del partíu que sofita al Gobiernu. El PSOE ye l’únicu que pue mañana mesmo destupir el procesu de reforma del Estatutu y sentar a los demás partíos a debater sobre un documentu. Ye la hora de la política de verdá. Hai una parte importante de la sociedá que reclama unos derechos que son de xusticia y ye un imperativu democráticu que los partios políticos apauten la forma de concedé-ylos”, reclama la XDLA.

El PP, los derechos llingüísticos y Catalunya

La organización cívica reclama d’igual forma “a los grupos parllamentarios que n’Asturies llevanten campañes de falsedaes contra la oficialidá, qu’espliquen por qué nun faen lo mesmo neses comunidaes”. Nesi sen fixo referencia al actu entamáu pol PP el sábadu contra lo derechos llingüísticos de los falantes d’asturianu y gallego-asturiano con dirixentes populares llegaos de tierres catalanes: “Taba bien entruga-yos si tán en contra de la oficialidá en Cataluña. O, yá que la oficialidá ye tan negativa, por qué nun se posicionaron a favor d’eliminala en Cataluña. La cuestión que nunca respuenden ye por qué’l PP nun ta contra la oficialidá más que n’Asturies”.

Na semeya, manifestación pola oficialidá del 16 d'ochobre per Uviéu.