La XDLA nun descarta entamar meses-taller nueves tres l’ésitu de la revisión del Llibru Blancu

Esti miércoles zarróse la revisión del Llibru Blancu nel so 15 aniversariu cola celebración de la cuarta mesa-taller d'estes xornaes. La XDLA nun descarta entamar alderiques nuevos nos meses próximos que toquen otros temes.
 
Les conclusiones principales sacaes pola Xunta pola Defensa de la Llingua Asturiana (XDLA) del ciclu de meses-taller ’15 años del Llibru Blancu: revisión y actualización de la política llingüística’ foron la necesidá d’ampliar la ufierta educativa de llingua asturiana a tolos centros públicos, concertaos y privaos, la dotación de más medios a los servicios de normalización y la demanda d'un cambiu na política de subvenciones a los medios de comunicación.
 
Tres l’ésitu d’estes xornaes, esti coleutivu ciudadanu nun descartá celebrar meses nueves o entamar ámbitos de debate nuevos p'abrir "un periodu nuevu p'ampliar el procesu d'análisis del futuru de la normalización, nos temes mentaos y naquellos nuevos derivaos de les tresformaciones sociales y teunolóxiques de los últimos años". Dalgunos d’estos temes podríes ser la producción cultural n'asturianu, los movimientos de reivindicación llingüística, l'asturianu como llingua comunitaria, los movimientos de población y les proyeiciones demográfiques y les teunoloxíes nueves.
 
Na semeya, un momentu de la mesa-taller celebrada ayeri na que participaron Ramón d'Andrés, David Guardado, Llucía Menéndez y Carlos Pulgar.