La XDLA llamenta que la programación infantil en TPA quede “en menos de cuatro hores”

Esta Selmana Santa la TPA emitió l’espaciu ‘Animalada Xabaz’, con numberosos comentarios positivos en redes sociales. La Xunta pola Defensa de la Llingua Asturiana (XDLA) llamenta que la programación infantil n’asturianu quede “en menos de cuatro hores” y reclama a la direición del ente producción asturiana y doblaxes.

“Toles televisiones autonómiques de comunidaes con llingua propia diferente al castellanu dediquen una parte importante de la so programación a emitir una montonera de series y películes d'animación nes sos llingües. Nel casu de TPA, esta Selmana Santa ta emitiendo ocho capítulos del espaciu 'Animalada Xabaz', pagáu pola Conseyería de Cultura, que s'emiten nun horariu marxinal (9.45 hores) y en bloque cuatro díes siguíos”, esplica’l coleutivu cívicu.

“Quier dicise, TPA va emitir nel 2021 menos de cuatro hores de programación infantil n'asturianu y estos conteníos nin salen del so propiu presupuestu”, sigue la XDLA, pa la que “nun tien xacíu que la Conseyería de Cultura dedique una partida pa una radiotelevisión que yá recibe 23 millones d'euros de dineru público al traviés de la Conseyería de Presidencia y que, según diz l'Estatutu, la Llei d'Usu y la so llei de creación, tien que ser una ferramienta p'ayudar a normalizar l'asturianu y el gallego-asturianu”.

Asina reclama a la dirección de RTPA la puesta en marcha d'una programación infantil “nel nuestru idioma duradera nel tiempu” que se cubra col prespuestu propiu del ente, “con producción asturiana y con doblaxes”. Una posibilidá sería dar continuidá a ‘Animalada Xabaz’, “un programa que pa la organización cumple con tolos requisitos de la Llei de creación de RTPA, como son el serviciu públicu, l'atención a la problación más mozo, la normalización de les llingües propies y la promoción de la cultura asturiana”, ensin escaecer que supón “una fonte d'emplegu pa músicos y actores”.

Por contra, la realidá ye que’l sábadu y el domingu, depués de los capítulos de ‘Animalada Xabaz’, la TPA emitió “películes infantiles con un doblaxe al castellanu fechu por empreses contrataes fuera d'Asturies. Quier dicise, TPA sí va dedicar el so presupuestu a ufrir los mesmos conteníos que van poder vese en televisiones como Clan, Boing, Neox o Cartoon Network, mentes que pa los conteníos n'asturianu dedica 0 euros”, esplica.

“Les comparances dexen a les clares la visión de la cultura y la llingua asturiana que tienen dende la dirección de RTPA y la necesidá d'un cambiu. Hai que recordar qu’ensin el papel activu de la RTPA ye imposible ‘salvar l’asturianu’ y, muncho menos, eso que tanto repiten de ‘recuperar l'arguyu de ser asturianu’” fina la XDLA.

Na semeya, un momentu del programa 'Animalada Xabaz'.