La XDLA fixo entrega d’unos premios críticos marcaos pola ausencia obligada de los gallardonaos

Residentes en Madrid, Breizh o Alemaña. Los trés ganadores de los Premios Críticos de les Lletres Asturianes nun pudieron recibir el motivu que-yos entregaba la XDLA al nun tener la posibilidá de desplazase dende los sos llugares de trabayu.

Esta circunstancia, de la que los organizadores diéronse cuenta tres recibir les cuatro actes de los xuraos, marcó la l’actu de entrega de los primeros Premios Críticos de la Llingua Asturiana convocaos pola Xunta pola Defensa de la Llingua Asturiana (XDLA), de manera esceicional, como respuesta a l’ausencia de la llingua asturiana nos XIII Premios de la Crítica de l’Asociación d’Escritores d’Asturies. Un bon espeyu de la realidá que ta viviendo Asturies, con una bona parte de la población fuera del país o a piques de facer les maletes. Sicasí, l’ausencia de los premiaos nun empañó la gala, que tuvo un marcu de luxu: les instalaciones de la galería d’arte uviedina Texu.

Miguel Rodríguez Monteavaro foi l’encargáu de presentar l’eventu xunto con Llucía Menéndez Suárez, abriendo l’actu con un discursu nel que la XDLA criticó a l’Asociación d’Escritores d’Asturies, “que muncho tira de nome, pero pocu casu faen a los escritores asturianos”. Dende’l coleutivu cívicu refugaron les escuses de la crisis y de la poca producción na lliteratura asturianu que se dieron dende l’asociación que venía dando premios a l’asturianu dende l’añu 2002, remarcando que nel 2011 espublizáronse 147 obres tanto en llingu asturiana como en gallego-asturiano, y apuntaron qu’esta convocatoria de los Premios Críticos de les Lletres Asturianes quier “ser el puntu de partida pa que nun futuru los escritores asturianos y/o les editoriales s’asocien y puxen por facer ente toos daqué meyor de lo que nós, humildemente, podemos organizar”.

“Como si esti panorama demencial nun fuera abondo, cuando los xuraos se reunieron pa decidir los sos ganadores, decatámonos, una vez conocíos los veredictos, que nin ún solo de los premiaos vive n’Asturies. Poco se pue dicir d’un país que tien a lo meyor de la so intelectualidá xenerando producción cultural espardío pel mundu”, continuó Rodríguez Monteavaro, que señaló qu’estos gallardones tamién podíen llámase ‘Premios Pantasma’. Y ye que Bertán Piñán, ganadora na estaya de lliteratura infantil y xuvenil por ‘La mio hermana ye una mofeta’, reside en Madrid; Pablo Rodríguez Alonso, n’ensayu por ‘De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad’, en Breizh; y Xabiero Cayarga, de poesía y narrativa por ‘La ñeve del cuquiellu’ y ‘El sol negru de Wewelsburg, de manera respeutiva, n’Alemañana.

El premiu simbólicu que recibieron estos trés escritores foi un trabayu artesanu en cueru, diseñu esclusivu pa los Premios Críticos de les Lletres Asturianes de Mónica Álvarez Viña. Piñán, que tenía prevista la so presencia, nun pudo desplazase finalmente a Uviéu, polo que recoyó la so recompensa Daniel Ramos. Mentes, en representación de Cayarga acudió la so hermana, Isabel, y na de Rodríguez Alonso, Rubén Ardura. Estos dos premiaos unviaron un videu que s’emitió nel actu nel qu’agradecíen el gallardón y l’esfuerciu fechu pola XDLA. Tres l’actu, el numberosu públicu presente pudo disfrutar de Vinu de Calidá de Cangas Ḷḷumes, quesu Afuega’l pitu Cá Sanchu y choscu, ente otros productos.

Na semeya, Menéndez Suárez llee les actes de los xuraos frente a los cuatro llibros premiaos situaos nel centru de la sala d'esposiciones de la galería d'arte El Texu.