La XDLA entrega los XXVIII Premios Andrés Solar el sábadu en Xixón

El Centru de Cultura Antiguu Institutu va acoyer el sábadu, a les 19.30 hores, la entrega de los XVIII Premios Andrés Solar. Dixebra y Trabe van recibir El Pegollu de la XDLA y los recortes en materia llingüística y la ‘Llei Wert’, El Madreñazu.

La Xunta pola Defensa de la Lllingua Asturiana (XDLA) dedica dende 1985 al escritor xixonés Andrés Solar, fináu n’accidente de tráficu nel 1984 a la edá de 29 años, estos gallardones col que’l coleutivu cívicu premia a la persona o entidá que destaca nel añu pola so defensa y promoción del idioma con El Pegollu. D’igual forma, castiga con El Madreñazu a aquellos que rescamplaren por tolo contrario. Nesta ocasión, los premiaos van ser cuatro, yá que la XDLA decidió repartir los Andrés Solar nes dos categoríes.

Asina, van recibir El Pegollu’l grupu de música avilesín Dixebra y Ediciones Trabe, que nesti 2012 cumplen 25 y 20 años, de manera respeutiva, trabayando pol idioma. N’opinión de la XDLA trátense de dos “proyeutos fundamentales pa entender el desarrollu cultural, social y económicu de la llingua asturiana nes últimes décades”. Tamién destaca’l “so apueste decidíu pola música y lliteratura a lo llargo de bien d'años, demostrando que l’asturianu ye una ferramienta útil y necesaria nel rellatu de la contemporaneidá d'Asturies”. Mentes, El Madreñazu va pa los recortes en materia llingüística y la ‘Llei Wert’, que va dexar nuna situación entá más precaria a la llingua asturiana na enseñanza. “Nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu. No que cinca a la llamada Llei Wert, solo hai que dicir qu’introduz brutales modificaciones que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa”, esplica’l coleutivu cívicu.

L’actu, como ye vezu, va contar con una actuación musical. Nesta ocasión van poder sentise les remezcles de Dani Stylo, que va facer reellaboraciones de cantares históricos de Dixebra. Tres la entrega de los premios, los miembros de la XDLA van xuntase pa celebrar una espicha na sidrería Canteli.