La XDLA denuncia que los nomes de llugar asturianos desapaecen nos cartelos de la zona rural xixonesa

|

El Conceyu de Xixón ta sustituyendo lletreros na zona rural que recueyen la toponimia oficial por otros colos nomes de llugar castellanizaos. La XDLA denuncia esta situación y critica con dureza la política llingüística del gobiernu municipal de Foro.

“Llavandera vuelve a ser ‘Lavandera’ o Vega de Baxo vuelve a ser ‘Vega de Abajo’, nomes que dexaron de ser oficiales dende’l día 3 d'ochobre del 2006, cuando’l Gobiernu asturianu aprobó oficialmente la toponimia depués del alcuerdu del mesmu Conceyu cola Xunta Asesora de Toponimia, colo que se reconocieron los nomes que la xente siempre dixo, que pasaron a ser oficiales a tolos efectos y d'usu obligáu per parte de les instituciones”, afirmen dende la Xunta pola Defensa de la Llingua Asturiana (XDLA). La zona rural xixonesa, con gobiernos en coalición del PSOE con Izquierda Xunida-Bloque por Asturies, foi l’área del Conceyu onde tuvo una mayor visibilización la toponimia oficializada recién gracies a la instalación de cientos de cartelos nel que s’indicaben los nomes asturianos de parroquies, de barrios y de caminos. El coleutivu cívicu critica esti pasu atrás dau agora en Xixón “polos prexuicios llingüísticos del partíu gobernante” y recuerda que l’usu de la toponimia non oficial “supón un ataque a la llexislación vixente”. Nel conceyu xixonés gobierna Foro Asturias Ciudadano en solitariu con apoyos puntuales del PP.

D’igual forma, la XDLA fai énfasis na gravedá de los fechos pola situación económica actual, yá que considera que’l Conceyu de Xixón ta fundiendo “una montonera de perres de tolos xixoneses pa cambiar cientos de lletreros” inclumpliendo la llegalidá namái “pola actitú antiasturiana y diglósica del equipu de gobiernu municipal, que muestra la so falta de respetu a la llingua y a la identidá d’Asturies; y tamién a la llexislación vixente y al trabayu de munches instituciones pola recuperación de la toponimia tradicional de los llugares d’esti país, como la Xunta Asesora de Toponimia y l’Academia de la Llingua Asturiana”. Nel equipu de gobiernu de Foro destaca la presencia del asturianista Carlos Rubiera, conceyal d’Educación, Cultura, Mocedá y Fiestes.

Dada esta situación tan grave, la XDLA reclama la convocatoria d’una reunión urxente del Conseyu Asesor, entidá formada por asociaciones, sindicatos, partíos y otres organizaciones presentes en Xixón p’asesorar al Conceyu en política llingüística.

 

Contador Estadistiques