La XDLA critica a Fernández por nun facer referencia al asturianu nel Debate d’Orientación Política

La Xunta pola Defensa de la Llingua Asturiana (XDLA) amosó la so indignación pola intervención del presidente nel Debate d’Orientación Política. Nel repasu fechu a le llinies próximes d’actuación del so Gobiernu nun hubo sitiu pal asturianu.

Na Xunta Xeneral, el presidente del país tocó la posibilidá de reformar l’Estatutu d’Autonomía, metida nel caxón pola FSA-PSOE y el PP dende’l 2008. “Fiel al so estilu, Javier Fernández sacó'l tema al debate políticu y públicu colos condicionantes del ‘despachu rápidu’ y del ‘amagüestu ensin lluz nin taquígrafos’. Y amás fíxolo usando siempre'l pasotismu y la dexadez que determinada clas dirixente asturiana utiliza sistemáticamente como táctica de desprestixu del testu llegal más importante d'Asturies”, llamenten dende’l coleutivu cívicu, pa depués añadir que “l'oxetivu principal ye facer a tola sociedá asturiana partícipe y cómpliz de la deriva de les últimes décades que, en cuenta d'afitar el futuru d'Asturies, dedicóse a la negación de sí mesma y a enanchar les sos dependencias”.

La falta d’alusiones a la llingua del país nel discursu de Fernández nun sorprendió a la XDLA, qu’apunta que “tamién foron bien calculaes les ausencies de referencies al asturianu nel terrén d'Educación y Cultura, teniendo en cuenta que Fernández encabeza un Gobiernu que ta siguiendo la ‘tradición’ de proponer el caos y la dexación na xestión de la enseñanza de la llingua asturiana, y l'arrequexamientu y la inoperancia nel desarrollu de polítiques llingüístiques afayadices que traten de dar futuru al nuestru idioma. Sabemos qu'a él nun-y da más, pero hai una parte importante de la sociedá a la que sí-y da más por más que se ximielgue la pantasma de la crisis como coartada pa too”, sentencia. Esta organización esixe tamién un tratamientu de la llingua asturiana “acordies cola so importancia na vertebración del futuru d'Asturies; planificando y comprometiéndose a facela visible y normal na alministración, na educación, nos medios de comunicación, etc.”. Por últimu, la XDLA afirma que “si dalgún sentíu tienen les reformes estatutaries ye'l de reconocer derechos fundamentales de la ciudadanía y non negalos”.