La XDLA cree que'l plan del ministru Wert va perxudicar enforma l’enseñu de Llingua Asturiana

|

La Llei Orgánica pa la Meyora de la Calidá Educativa que promueve’l ministru Wert y l’actitú del PSOE pa cola llingua asturiana esmolez a la XDLA. El coleutivu cree que va perxudicar enforma l’enseñu de Llingua Asturiana, yá precariu.

Según esplica la Xunta pola Defensa de la Llingua Asturiana (XDLA) nun comunicáu, l’anteproyeutu presentáu pol PP cuenta con “menguar la diversidá curricular n’enseñu primariu, quitar la optatividá na enseñanza secundaria obligatoria y facer desapaecer itinerarios formativos. Esos recortes, amestaos a la mengua de l’autonomía de l'alministración educativa asturiana, que va pasar de poder decidir el 35 por cientu del currículum a namás el 25 por cientu, puen ser la sida pal Gobiernu d’Asturies pa consumar un ataque más al enseñu del asturianu, si acasu’l más grave, porque vien de quien tenía que tar pa defendelu”. L’ausencia d’oficialidá ye lo que lleva al asturianu a tar nesta situación, según afirmen dende’l coleutivu ciudadanu que vien demandando esti estatus pal idioma dende su fundación nel 1984.

“El PSOE fai gala de tar en contra de la oficialidá de la nuestra llingua, inorando que ye la proteición llegal que necesita pa sobrevivir y pa reconocer los derechos llingüísticos de los y les falantes. La Conseyería d’Educación, Cultura y Deporte diríxela Ana González, que presume de nun falar nin escribir asturianu, fiel a los mandaos del so partíu. Y, anque se-yos enllena la boca prometiendo potenciar les posibilidaes de la Llei d’Usu y Promoción del Asturianu, siguen incumpliéndola sistemáticamente tamién en cuantes a educación: l’asturianu nun ta presente en tolos niveles educativos; nun se respeta la voluntá d’estudiar asturianu de tol alumnáu y de toles families que lo demanden; nun se reconoz la especialidá del profesoráu d’asturianu… En definitiva, tiense a la llingua asturiana nun situación de caos permanente y con un estatus d’inferioridá en comparanza con otres árees y asignaturas”, continúa’l documentu de la XDLA, que refuga dafechu la Llei Wert.

 

Contador Estadistiques