La XDLA cifra nun 0,85 por cientu’l porcentaxe d’emisión n’asturianu de la RTPA pal 2021

|
RTPA 100 por cien n'asturianu XDLA calendariu

“Dende qu'empezó la llexislatura, la radiotelevisión pública dedicó cero euros del so presupuestu a la producción de conteníos nes llingües propies d'Asturies”, denuncia la Xunta pola Defensa de la Llingua Asturiana (XDLA). El coleutivu cívicu cifra nun cifra nun 0,85 por cientu’l porcentaxe d’emisión n’asturianu y gallego-asturiano que tendrá nel 2021 l’ente públicu de comunicación.

La resolución de la ‘Convocatoria estraordinaria d’encargos de producción pa la promoción de la llingua asturiana y el gallego-asturiano’ fecha pola Conseyería de Cultura, Política Llingüísticu y Turismu y la RPA, a la que’l Gobiernu destinó 138.000 euros, da’l preste a 7 proyeutos dexando fuera 36, informa la XDLA, qu’apunta que “esto va representar que nel 2021 la RTPA dedique al asturianu namás que'l 0,85 por cientu de la so emisión anual. Quier dicise, 4.475 minutos de 525.600 posibles”.

“Nun tien xacíu que la Conseyería de Cultura dedique una partida pa una radiotelevisión que yá recibe 23 millones d'euros de dineru público al traviés de la Conseyería de Presidencia y que, según diz l'Estatutu, la Llei d'Usu y la so llei de creación, tien que ser una ferramienta p'ayudar a normalizar l'asturianu y el gallego-asturianu”, recuerda’l coleutivu cívicu, que critica que la direición de la RTPA “actúa como si TPA y RPA fueren cadenes monollingües en castellanu”. “Depués d'añu y mediu de llexislatura, vemos que RTPA nun dedicó nin un euru del so presupuestu a producir conteníos n'asturianu a pesar de, repetimos, los 23 millones d'euros que tien de presupuestu”, añade.

“Agora, con esta convocatoria, queden fuera de la parrilla del 2021 programes d'entretenimientu, deportivos, culturales y hasta series de ficción que diben tener l'asturianu como idioma vehicular. Agora toca saber si, dexando de llau esta convocatoria, RTPA va producir otros programes nuevos n'asturianu. Tampoco nun sabemos con qué criteriu s'escoyeron los proyectos, en qué midida van llegar a sectores estratéxicos pa la recuperación llingüística y si hai un compromisu de RTPA pa emitilos n'horarios afayadizos y con una promoción importante dientro de la cadena”, sigue la XDLA, qu’apunta que’l costu d’éstos sumaríen “1.000.000 d'euros de presupuestu, lo que val pa evidenciar la capacidá de producción n'asturianu y gallego-asturianu que tien el sector audiovisual y lo poco qu'en realidá s'apoyen les emisiones nes llingües propies dende la radiotelevisión pública”.

Contador Estadistiques