La XDLA califica de “poco ambiciosu” y “continuista” el proyeutu de presupuestos de promoción del asturianu

|
Llápiz de memoria Presupuestos 2021

El presupuestu que’l Gobiernu destina a la Direición Xeneral de Política Llingüística nun convence a la Xunta pola Defensa de la Llingua Asturiana (XLDA), que lu califica de “poco ambiciosu” y "continuista". “Fai declaraciones en favor de la supervivencia del idioma, pero nun lo traduz en más inversión”, asegura.

“Sabemos de la escepcionalidá del momentu derivada de la situación sanitaria, pero tamién conocemos el papel de reactivación económica que podía xenerar una industria cultural potente basada na especificidá llingüística del nuestru territoriu. Pa eso ye necesaria una política de normalización llingüística ambiciosa con recursos humanos y medios económicos que, al analizar esti proyeutu de presupuestos, ye evidente que siguen faltando”, esplica la XDLA, que recuerda que’l dineru dedicáu a la promoción del asturianu pa esti 2021 supón un 3,46 por cientu del prespuestu de la Conseyería de Cultura, Política Llingüística y Turismu (nel 2020 yera del 4 por cientu) y un 0,04 del total del Gobiernu, al igual que nes cuentes d’esti añu. “Polo tanto, nun se pue facer otra valoración distinta a la que la fiximos l’añu pasáu: son unos presupuestos continuistes y decepcionantes”, afirma.

Tamién critica la partida pa la RTPA, yá denunciada n’ocasiones anteriores pola organización. “Nun hai qu’escaecer que l’ente públicu yá dispón de más de 24 millones d'euros de financiación directa al traviés de la Conseyería de Presidencia”, apunta, pa depués recordar que “ta diéndose contra l'Estatutu, la Llei d'Usu y la Llei de creación de RTPA, qu'establecen que los medios públicos tienen que ser una parte fundamental nel procesu de recuperación llingüística. Quier dicise, Política Llingüística tien que paga-y 100.000 euros a la RTPA porque con esos 24 millones paez que nun-y algama pa cumplir lo que tenía que ser el so deber”.

Otra manera, tamién con respeuto a la televisión y radio públiques, rescampla que “un aspectu tan importante pa la normalización llingüística como’l doblaxe de películes, series y programes sigue ensin encarase de manera seria”. Por esti motivu la XDLA reclama la robla d’un conveniu de collaboración cola RTPA “pa la creación d’un Serviciu Asturianu de Doblaxe y Traducción”, entidá que “taría encargada de coordinar los doblaxes y subtitulaos y supervisar los trabayos de les empreses, amás d’avalar el so modelu llingüísticu”.

Tresversalidá

La organización cívica empondera los xestos de política llingüística tresversal nes campañes institucionales de los útimos meses, que “demuestren que se pue facer normalización dende otros departamentos del Gobiernu ensin un gastu significativu mayor”. Sicasí, insiste en que “una política llingüística decidida, la necesaria pa una situación crítica del patrimoniu llingüísticu asturianu como l’actual, tien qu’implicar necesariamente un aumentu curiosu de les partíes presupuestaries dedicaes a ella”.

Na imaxe, llápiz de memoria colos Presupuestos. Semeya obra d'Armando Álvarez.

Contador Estadistiques