La XDLA anuncia un homenaxe a Yolanda Huergo en setiembre

Cumplése un añu de la perda de la militante asturianista y conceyala en Xixón.

El 6 d'agostu del 2020 recibimos una noticia que dexó'l corazón xeláu de tolos que la conocíen. Yolanda González Huergo finaba llueu de lluchar tiempu con una enfermedá que la llevara eses selmanes últimes a tar ingresada en Cabueñes.

El so recuerdu, sicasí, sigue con nós, y la Xunta pola Defensa de la Llingua Asturiana (XDLA), de la que yera militante, prepara un homenaxe a la so figura. Va ser nel Muséu del Pueblu d'Asturies, el 26 de setiembre, con una xornada que se va allargar de 13.30 a 19 hores y conteníos que la organización cívica va dir anunciando en feches próximes.