La web nueva d’Avilés escaez la llingua asturiana

|

A finales de payares, el Conceyu d’Avilés xubió a la rede la so páxina web nueva col oxetivu d'aumentar la so seguridá y accesibilidá. Ésta ta disponible namái en castellanu, pese a que tamién ufre la escoyeta del inglés. L’asturianu nun apaez ente los idiomes disponibles.

Esta situación llevó a Iniciativa pol Asturianu a presentar una quexa a l’alcaldesa Pilar Varela dada la importancia que tien esta ferramienta, qu’ufre al ciudadanu la posibilidá de facer xestiones en llinia. L'asociación considera “inaceptable que'l gobiernu municipal escaeza l'asturianu y arrenuncie a normalizar la llingua propia na rede, magar que cunta con un serviciu de normalización n'activu, la Estaya de la Llingua, que bien podría encargase d'esti trabayu”. Por esti motivu, encamienta al Conceyu d’Avilés “a iguar de manera inmediata esta situación de discriminación y garantizar los derechos llingüísticos de tola ciudadanía”.

La web nueva, renovada y actualizada por Izertis, tuvo un costu de 174.200 euros y llevóse alantre tres les critiques pola mala accesibilidá y distribución de los conteníos de l’anterior. Asina, l’actual inclúi seis estayes (Ayuntamientu, Cultura, Deportes, Turismu, Empreses y  Mocedá) y la posibilidá d’acceder a la información requerida al traviés d’un restolador. De momento, namái ta disponible en castellanu pese a que da la opción d’escoyer tamién l’inglés –al traviés d’una bandera estauxunidense–. La idea ye ufrir nel futuru otros idiomes, anque nun se confirmó cuáles.

Contador Estadistiques