La web del Principáu, ente les menos amañoses de toles autonomíes

El 82% de los portales n'Internet de los gobiernos autonómicos nun cumplen los encamientos internacionales pa desarrollar sitios web accesibles pa xente mayor y discapacitaos, según diz un estudiu de la consultora Acctiva, que va poco fizo tamién un estudiu sobre l'accesibilidá de les webs de los conceyos.

L'informe destaca qu'anque dellos gobiernos autonómicos apautaron midíes pa meyorar l'accesibilidá del portal, lo cierto ye que nun se llega a cumplir cola norma internacional WAI (Web Accessibility Iniciative) qu'apauta'l W3C, precísamente la institución funadada pol Premiu Príncipe d'Asturies Tim Berners-Lee y que va tener n'Asturies la so sé central pa los países de fala castellana

El resultáu del analís conclúi qu'Andalucía tien la web más amañosa de toles alministraciones autonómiques españoles, llegando a pasar les prebes pa la clasificación de "triple A" que ye l'indicativu de meyor funcionamientu, mientres que tan tamién con bona puntuación Valencia, Cantabria, Madrid y Galicia. A la contra, la web d'Asturies (www.princast.es) nun llega a cumplir colo que se pide pa la clasificación d'una sola "A" y apaez nel puestu 15 de 17 nun pelotón en que tan tamién Navarra y Extremadura y nel qu'Euskadi y La Rioja apaecen como les alministraciones coles webs menos amañoses de consultar.