Selmana de les Lletres Asturianes

La web de les playes nin tien versión n’asturianu nin respeta los nomes tradicionales de les sableres

|
Páxina Playes d'Asturies

Esta selmana’l Gobiernu estrenaba una páxina web qu'ufierta información en tiempu real sobre la ocupación de les sableres asturianes y l'estáu de les marees pa esti branu marcáu polos controles d’aforu pola COVID-19. Ésta nun tien versión en llingua asturiana nin respeta los nomes tradicionales de les playes.

‘Barro’, ‘Borizo’, ‘Luanco’, ‘Poo’, ‘Luarca’ o ‘Frejulfe’ son dalgunos exemplos de los topónimos qu’apaecen na web, que namái usa la forma castellanizada de los mesmos. Los tradicionales, únicos oficiales, como Barru, Borizu, Lluanco, Po, Ḷḷuarca y Frexulfe –Navia ta entovía pendiente d’aprobar el so decretu–, nun apaecen.

Pero el non cumplimientu de la toponimia, a lo que ta obligada l’Alministración, nun ye l’únicu escaezu. Tampoco cuenta con versión n’asturianu esta páxina desendolcada pola Direición Xeneral de Seguridá y Estratexa Dixital en collaboración cola d’Alministración Llocal y con financiación de la Viceconseyería de Turismu, dependiente de la Conseyería de Cultura, Política Llingüística y Turismu.

Emplegu de la intelixencia artificial

L'oxetivu d'esta iniciativa ye ufiertar un mecanismu d'ayuda pa regular la ocupación de los arenales y evitar escesu d'aforu, de manera que la ciudadanía pueda esfrutar del branu con mayor seguridá. Amás, la web ufierta detalles sobre la variedá y riqueza de la contorna mariñana con semeyes y datos descriptivos de cada sablera.

Inclúi tamién un apartáu pa la recoyida d'información y xenera un repositoriu de los datos rexistraos: ocupación, datos meteorolóxicos agrupaos nes estaciones de cada zona, temperatures, hores de sol, precipitaciones o velocidá del vientu. El desarrollu teunolóxicu básase na intelixencia artificial aplicada a la reconocencia d'imáxenes, identificando’l nivel d'ocupación en cada momentu al traviés d'imáxenes recoyíes poles cámares web per aciu de téuniques de visión artificial desenvueltes pola empresa asturiana TacticaTic.

Hasta agora na web incluyéronse aquelles sableres que cuenten con salvamentu y cámares que permiten rexistrar imáxenes. Sicasí, p'ameyorar la calidá y la cantidá de la información, algamóse un alcuerdu cola Federación Asturiana de Conceyos (FACC) pa que los ayuntamiento doten a les playes de les infraestructures necesaries pa la recoyida d'imáxenes.

Contador Estadistiques