La Vuelta vive n’Asturies la so etapa reina tres una llucha espectacular pol lideratu en Los Llagos

|
La etapa de Los Llagos d’Enol y La Ercina nun defraudó y deparó un duelu espectacular ente Purito y Contador, los dos favoritos a llevase La Vuelta. Esta llucha va vivir esti llunes un episodiu nuevu nes rampes del Cuitunigru, novedá na ronda.
 
Los aficionaos al ciclismu qu’enllenaron la xuba a Los Llagos ayeri, y los que lo vieron per televisión, pudieron disfrutar, amás de los impresionantes paisaxes asturianos, d’un final d’etapa espectacular nel qu’Alberto Contador (Saxo Bank-Tinkoff Bank) trató d’abrir distancia con Joaquim ‘Purito’ Rodríguez (Katusha) hasta en cinco ocasiones con cinco ataques duros que nun pudieron col catalán, que ta firmando una Vuelta estraordinaria. Como convidaos de la exhibición de los dos primeros clasificaos de la ronda, dos ciclistes del Movistar, el colombianu Nairo Quintana y el murcianu Alejandro Valverde, qu’algama la tercer posición na xeneral tres otra mala actuación el británicu Christopher Froome (Sky).
 
Mentes Purito y Contador batallaben nes rampes d’hasta’l 15 por cientu de la xuba a los Llagos d’Enol y La Ercina, arriba, na cima, Antonio Piedra (Caja Rural) celebraba’l que ye’l so ésitu mayor como ciclista profesional. L’andaluz formaba parte d’una escapada de diez ciclistes que llegó al entamu del altu con una ventaya de casi 14 minutos sobre’l pelotón. Taba nidio qu’entre ellos diba tar el ganador de la etapa. El kazaquistanín Andrey Kashechkin (Astana) foi’l primeru n’intentar un ataque, ensin ésitu, y l’únicu que trató de siguir a Piedra cuando ésti anició una escapada que terminó col sevillanu llevantando los brazos nun marcu incomparable comos Los Llagos. El del Caja Rural xubió en solitariu 11 de los 12 quilómetros del altu.
 
Güei, el Cuitunigru
 
 
CuitunigruLa segunda etapa de La Vuelta que trescurre per Asturies tien llugar güei con salida en Xixón y final nel Cuitunigru, la considerada etapa reina d’esta edición de la ronda ciclista. Nella s’espera otru duelu ente Purito, líder de la carrera, y Contador, segundu na xeneral a 22 segundos. En tercer puestu ta Valverde, a 1.41, y en cuartu Froome, a 2.16.
 
El Cuitunigru trátase d’una prollongación de 2,8 quilómetros de l’ascensión al Puertu Payares dende Braniḷḷín que pa poder xubise obligó al asfaltáu d’una vía de serviciu. Con rampes que lleguen al 24 y al 25 por cientu, esta cima promete ser un espectáculu pa los aficionaos al ciclismu. Sicasí, la so introducción nel percorríu de La Vuelta nun ta llibre de polémica, yá que coleutivos ecoloxistes y políticos, como Andecha Astur, calificaron d’atentáu medioambienta l’asfaltáu de la pista de tierra que llevaba hasta’l Cuitunigru al ser ésti un espaciu protexíu.  
 
Contador Estadistiques