La Vuelta llega a Asturies ensin respetar la toponimia oficial

|

Esti vienres llega La Vuelta a Asturies, onde van celebrase dos etapes que van decidir la ronda ciclista. Otru añu más, la carrera d’Unipublic nun respeta la toponimia oficial, dalgo que nun asocede nin en Galicia nin en Catalunya.

Asturies.com trató de ponese en contautu en delles ocasiones coles estayes del Gobiernu correspondientes nos meses últimos pa conocer les causes d’esti incumplimientu permitíu pol Executivu –ésti pon perres pa que La Vuelta llegue a Asturies–, pero namái la direutora de Política Llingüística atendió a esti mediu de comunicación. Ana Fueyo aseguró en too momentu qu’ella treslladara a la Direición Xeneral de Deportes tola documentación cola toponimia tradicional, anguaño oficial, y qu’insistiera enforma nesti asuntu. Sicasí, puestos en contautu col gabinete de comunicación de Deporte, ésti treslladonos a Turismu, dependiente de la Conseyería d’Economía y Emplegu, onde los nuesos pidimientos d’información quedaron ensin respuesta.

Lo cierto ye que, otru añu más, la toponimia oficial nun se respeta en La Vuelta por mor de la pasividá del Gobiernu del PSOE. Nesi sen, Unipublic, empresa organizadora de la ronda ciclista, apuntó a Asturies.com l’añu pasáu la so disponibilidá n’utilizar la toponimia oficial del llugar, como fixo en Galicia o Catalunya, países con llingua propia pol que pasó la carrera esti añu. Una situación que nun dexa de sorprender pese a nun ser nada nuevo.

Crítiques d’Iniciativa pol Asturianu

El trabayu que debía de facer el Gobiernu sí que lo desendolcó Iniciativa pol Asturianu, que se punxo en contautu con Unipublic al traviés d’una carta pa tresllada-y los errores nel llibru de ruta a su pasu por Asturies, ensin respuesta. El coleutivu que trabaya na normalización de la llingua critica “la falta de sensibilidá y cumplimientu de la llegalidá toponímica cuando otros eventos deportivos estatales celebraos n’Asturies, como’l Campeonatu d’España de Duatlón celebráu en Xixón nel 2010, yá usaron non solo la toponimia, sinón tamién l’asturianu con total normalidá”. Amás,  considera “denunciable tamién la falta d’acción de la Dirección Xeneral de Política Llingüística, de la Dirección Xeneral de Deportes y del Gobiernu d’Asturies en xeneral, y los conceyos per onde pasa esta carrera, pa facer cumplir col usu de la toponimia nesti tipu d’eventos”.

Pa Iniciativa pol Asturianu, l’usu de los topónimos derogaos en televisión, periódicos y otros espacios, fai que se sigan calteniendo “unes formes de los nomes de llugar que nun se correspuenden colos verdaderos y oficiales dende va munchos años, en dalgunos casos cuasi una década”. Ye por ello que’l coleutivu entiende que “nun hai escusa de nengún tipu pa evitar esti usu y nun pueden falar de desconocimientu –en referencia a Unipublic–, yá que fueron informaos va selmanes d’estos erros per parte de la nuesa organización”.

Dos etapes

Mañana va tener llugar la primer de les dos etapes que van percorrer les carreteres asturianes, con salida en San Vicente de la Barquera y final nel Naranco. Mentes, el sábadu va celebrase la xornada más esperada polos aficionaos al ciclismu: la que tien final en L’Angliru. Ésta va salir d’Avilés y va tener un llargor de 142,2 quilómetros duros, col pasu de trés puertos de montaña, a los qu’hai que sumar la cima riosana. La carrera va finar el domingu en Madrid, asina que’l so ganador va decidise n’Asturies.

De momento, y a falta de la peligrosa etapa d’esta tarde en Peña Cabarga, el maillot colloráu ta en posesión del italianu Vincenzo Nibali (Astana) con una ventaya de namái 28 segundos col estauxunidense Chris Horner (Radioshack Leopard). Tamién tienen opciones el murcianu Alejandro Valverde (Movistar), a 1.14, y el catalán Joaquim ‘Purito’ Rodríguez (Катюша), a 2.29. L’uviedín Samuel Sánchez (Euskaltel Euskadi) ta novenu, a 7.33 del líder, polo que les sos aspiraciones pasen por ganar una etapa en territoriu asturianu.

Na imaxe, percorríu de la etapa 20 de La Vuelta, ente Avilés y L'Angliru, onde se pue ver cómo nun se respeta la toponimia.

Contador Estadistiques