La vuelta del frangüesu yá ye una realidá

Dempués de dos años de llabor, apaecen agora los primeros resultaos del programa de recuperación del frangüesu nel Parque de los Picos d'Europa, onde la especie llevaba sesenta años desapaecida

La Fundación para la Recuperación del Frangüesu presentó esta selmana datos de la campaña de recuperación de la especie nos Picos d'Europa. El presidente de la Fundación Gerardo Báguena recordó qu'entovía queda per delantre añu y mediu de llabor pa rematar el proyectu, pero congracióse de que'l frangüesu yá tea presente otra vuelta na vertiente asturiana del parque. Según datos de la Fundación, esti añu lleven viéndose siete meses seguíos exemplares per tol parque y, como novedá, tamién s'acolumbraron exemplares estes selmanes na parte alta del Cares, onde se vieron frangüesos volando ente los meses de febreru y mayu, datos que confirmen y meyoren los del añu 2.003, cuando yá se dio anuncia de la presencia ocasional d'una pareya de frangüesos nel parque.


Desaniciaos cásique de toa Europa, los frangüesos quedaron arrequexaos a la parte del Pirinéu, onde s'entamaron va años midíes de recuperación que permitieron que la especie guañare y se llegare a una población de 400 exemplares. Como'l frangüesu suel dir espardiéndose per llugares nuevos según va multiplicándose la especie, l'area xeográfica que cubre ye cada vegada mayor.