La Voz del Ríu traenos poemes y música asturiana

L'últimu discu de la discográfica Fonoastur, "La Voz del Ríu", xunta los poemes del escritor Xuan Bello cola gaita de Flavio R. Benito, amás d'otros instrumentos y instrumentistes.

La xera de venceyar una música a un poema, ye bien difícil, y muévese per un camín complicao nel que puede que nun consigamos dar esa sensación de coherencia ente la música y el poema. El retu ye grande, pero'l poeta Xuan Bello y el músicu Flavio Rodríguez Benito atreviéronse a encaralu. Pero, too hai que dicilo, el proyectu nun partía de cero, ya que la idea d'unir la música y la poesía d'estos artistes yá se fizo per primer vegada en París, na Expollingua 2003, pa depués repetise nel Festival Intercélticu de Lorient tamién nel 2003, onde xunta a Berta Piñán que tamién tuvo en París, la gaita de Flavio intercalábase colos poemes de Berta y Xuan. Dempués d'eses dos esperiencies Xuan Bello y Flavio R. Benito y Lisardo Lombardía, co-productor del discu, vieron que la formula resultaba, y entamó a madurar la idea de grabar un discu col material.

El resultáu ye esti "La Voz del Ríu", catorce poemes que Xuan Bello esbilló cronolóxicamente de "La Vida Perdida", la so antoloxía billingüe, a los que Flavio púnxo-yos música dempués de facelos suyos y surdir per ellos. La música quier falanos con soníos de lo que cuenta y faen sentir los poemes, y anque eso ye mui personal, si tenemos na música unos ritmos, formes de tocar y tonalidaes que les más de les veces apegase bien col poema. La gaita de Flavio nun tuvo que facer el trabayu sola, acompañáronla más instrumentos y músicos, amás de la gaita Flavio tamién grabó delles xiblates, Ígor Medio aporto'l so bouzouki, Antón Barquero percusiones y Roberto Junkera teclaos y baxu pedal.