La vida d'Horacio Fernández Inguanzo llega al cine

El realizador asturianu Ramón Lluis Bande presenta güei domingu a les cinco de la tarde dientro del Festival de Cine de Xixón el so documental "El paisano: un retratu colectivu" que recupera l'alcordanza d'Horacio Fernández Inguanzo, históricu militante antifranquista del que van cumplise agora los diez años de la so muerte.

Fíu d'un mayestru d'escuela socialista, Fernandez Inguanzo nació en Llanesnel añu1911, participando dende bien mozu n'organizaciones d'izquierda. Anque yera persona pacifista, la Guerra Civil oblígolu a tomar parte, entrando nel partiu comunista y na milicia, onde llegó a ser teniente d'artillería. N'acabando la guerra, intentó escapar a Francia, pero los nacionales prindáronlu t condenáronlu a muerte, anque tuvo la suerte de que nun lu llegaron a afusilar conmutándose-y la pena capital pola perpetua, qu'a la fin quedó nun destierru a Trevías, nel occidente asturianu. Dende la clandestinidá, Fernández Inguanzo, que pol so carisma personal foi ganando l'alcuñu de "El paisano", trabayó na reorganización de la oposición a la dictadura y en concreto na recuperación de la organización comunista n'Asturies, pasando dende los años 50 a la llegada de la democracia per un rosariu de temporaes nel esiliu y tamién na carcel, onde tuvo presu los últimos años de la dictadura hasta que se decretó l'amnistía que del añu 1976. Cola democracia Horacio Fernández Inguanzo pasó de ser el proscritu por escelencia d'Asturies a convertise en dirixente máximu del Partíu Comunista d'Asturies, cargu que garró dempués del cisma del congresu de Perlora, nel que dexó'l partíu l'actual presidente asturianu. Inguanzo foi diputáu pol PC nes dos primeres llexislatures de la democracia, recibiendo la Gran Cruz del Méritu Constitucional. Retiráu yá de la vida política, morrió en febreru de1996.

Agora, el director Ramón Lluis Bande preséntanos esti documental "El paisano: un retratu colectivu" que ye en realidá pal realizador el tercer episodiu d'una serie de trés documentales con esti que lleva faciendo los últimos años y nos que recueye la historia asturiana del sieglu XX dende'l puntu de vista de la izquierda política, completando asina'l camín abiertu con "Estratexa", sobre la guerrilla asturiana y "Lafuente" sobre'l personaxe de la revolucionaria del 34 Aida Lafuente. El testimoniu de 14 persones que conocieron y trataron a Fernández Inguanzo igua'l metraxe d'esti documental que va tener ocasión de volver a proyectase d'equí a opcos meses con motivu de los actos del 10 aniversariu de la muerte d'esti históricu personaxe.