La vida de Gonzalo Peláez llega al cómic

"Nel sieglu XII Asturies enfrentóse a un Rei" Con esti subtítulu preséntase nes llibreríes "Domno" un cómic obra de J.A. Marinas que recrea la vida y el tiempu de Gonzalo Pelaez, el noble medieval asturianu que protagonizó nel sieglu XII una serie de llevantamientos contra'l Rei Alfonso VII.

El caderalgu d'historia medieval de la Universidá d'Uviéu Javier Fernández Conde fai'l prólogu al cómic, sorrayando la trescendencia del sieglu XII na historia d'Asturies pola esistencia de trés personaxes que, d'una manera o d'otra, representaron una corriente d'oposición al monarca central y que pudiere ser paralela a la que llevó a la independencia de Portugal, tesis que Conde yá adelantare en dellos de los sos trabayos d'investigación. Estos personaxes foron el mesmu Gonzalo Peláez, la reina Urraca l'Asturiana y l'obispu Pelayo d'Uviéu.

Evidentemente, el cómic nun se mete en fondures históriques, pero ufierta 45 páxines de bon entretenimientu ambientaes nos escenarios de l'Asturies y la hispania medievales estraes d'acción, recreando los socesivos llevantamientos n'armes del noble asturianu hasta la so muerte víctima d'unes fiebres cuando preparaba un exércitu pa lluchar contra'l Rei castellanu dende'l so exiliu nel reinu de Portugal .