La variante de Payares agora sí ye una realidá

Un tren que salió de Madrid con autoridaes percorrió per primer vez los túneles d'una obra qu'arrancó nel 2004 y que tenía'l 2009 como fecha del fin de los trabayos.

Con unos cinco minutos de retrasu partía l'Alvia de la estación de Chamartín, previstu pa les 13.30 hores. Un viaxe históricu yá que por fin, depués de más de 30 años de reivindicación y cuasi 20 d'espera, la variante de Payares y la llegada de la velocidá alta ferroviaria a Asturies yeren una realidá.

Llueu d'una parada en Lleón de diez minutos, el tren diríxiase a La Roba, onde arranca'l tramu de 50 quilómetros hasta La Pola que salva'l Cordal con doce túneles, el principal el de Payares, de 25 quilómetros de doble tubu. Una obra de 4.000 millones d'euros qu'acurtia nuna hora'l viaxe.

A les 16.45 hores la estación d'Uviéu recibíalu. Na capital asturiana tenía llugar l'actu institucional, nel qu'intervieno el ministru de Tresportes y Movilidá Sostenible, Óscar Puente; el presidente de Castilla y Lléon, Alfonso Fernando Fernández Mañueco; el d'Asturies, Adrián Barbón; y el del Gobiernu estatal, Pedro Sánchez.

Mañana van principiar los viaxes comerciales pela variante. El primeru va salir de la estación de Xixón a les 6.28 hores, con llegada prevista a Madrid a les 10.15 hores; esto ye, va tener una duración de 3 hores y 47 minutos.

Na semeya, Sánchez, Barbón y el rei Felipe VI a la llegada del Alvia a Uviéu.