La Vagamar dio’l pistoletazu a seis díes d’actividaes con un homenaxe a la narrativa asturiana

Diecisiete personalidaes de la política y cultura asturiana participaron esti llunes nun homenaxe a la narrativa del país que sirvió de pistoletazu a la Vagamar 2012. Enantes tuvo llugar la tradicional arribada de congresistes y la inauguración oficial.

Alredor de les 18 hores, el ‘Cimavilla I’ llegaba a El Muelle tres facer un percorríu pela costa xixonesa. Ehí esperaba la Banda Gaites de Castrillón pa entamar un pasucais hasta’l Centru de Cultura Antiguu Institutu, sede onde van tener llugar toles actividaes de la Vagamar. Tres interpretar una pieza nel patiu, el públicu desplazóse hasta’l salón d’actos, onde Rafael Felgueroso, primer teniente d’alcalde de Xixón; María Esther García López, conceyala de Cultura de Castrillón; y Humberto Gonzali, coordinador d’actividaes de la Vagamar, presidieron la inauguración oficial.

El primeru en tomar la pallabra foi’l propiu Gonzali que calificó al eventu setembrín entamáu pola Asociación Culturar L’Arribada de “proyeutu abiertu y democráticu” que nació “pa facer enforma visible la lliteratura del país”. El coordinador destacó que “con pocos medios, pero abondos resultaos” la Vagamar consigue esi oxetivu dientro d’un marcu de pluralidá y criticó a les persones que desprecien la cultura asturiana en defensa d’una globalidá mal entendida. Pela so parte, la tamién escritora García López afirmó que “la llingua ye la madre de la nuesa cultura” y apuntó que “hai que tirar toos xuntos d’ella”. Tamién destacó la importancia de qu’actos como la Vagamar “tengan ecu n’otros conceyos” y s’espardan per toda Asturies en referencia a l’actividá prevista por L’Arribada nel Conceyu de Castrillón enantes de que fine l’añu, a la qu’hai que sumar otra nel occidente del país.

La única persona que nun usó l’asturianu na presentación foi Felgueroso, anque comprometióse a falar en llingua asturiana na edición próxima. L’edil centró la so intervención na trayeutoria de la Vagamar, de la qu’eloxó la so “pluralidá”, qu’él entiende “como’l meyor antídotu contra’l sectarismu”. Por último, la Banda Gaites de Castrillón interpretó l’himnu del país.

Tres la inauguración oficial, celebróse la primera actividá de la Vagamar, que consistió nuna llectura institucional y cívica baxo’l nome de ‘Homenaxe a la narrativa en llingua asturiana y gallego-asturiano”. Personalidaes de la política y cultura del país lleeron testos firmaos por autores como Xosé Miguel Suárez ‘Tapia’, Adolfo Camilo Díaz o Lluis Porta Hevia, ente otros, improvisaron rellatos o contaron cuentos a lo llargo de más d’una hora de tiempu. Les persones que participaron nesti homenaxe foi, nesti orde, García López, la presidenta del PP xixonés Pilar Fernández Pardo, Xosé Nel Riesgo, Inaciu Iglesias, Alberto Álvarez Peña, Humberto Gonzali –en collaboración con Aurora García Rivas–, Xuan Xosé Sánchez Vicente, José Rogelio Álvarez Fernández, Roberto González, Marisa López, Xurde Morán, Luis Casteleiro, Miguel Rojo, Daniel García de la Cuesta, Arsenio González, García Rivas y Antón Caamaño, persona que s’encargo de presentar l’actu.

Pa finar la primer xornada, tuvo llugar un audiovisual que sirvió de presentación de la esposición fotográfica ‘Les dos cares d’Asia’, de Carlos Espina, abierta al públicu nel Antiguu Institutu hasta’l sábadu. Ésta ye una de les dos muestres que formen parte del programa de Vagamar, yá que l’Atenéu de La Calzada acueye tamién la espocición ‘Huella Astur’, de Tierra Astur, hasta’l xueves

Güei, xornada protagonizada pol teatru

Esi martes, l’actividá de la Vagamar va principiar a les 17 hores cola inauguración d’una amuesa d’arreglos Ikebana de l’armenia Marina Mikayelyan. Darréu, va tener llugar una ponencia de l’antropóloga, direutora d'escena y corresponsable de la compañía profesional de teatru Producciones Nun Tris, Inma Rodríguez, entitulada ‘El papel femenín nel teatru n’Asturies’ (17.30 hores), y una representación de la obra ‘Tempus fugit’. Por último, van presentase dos espublizaciones (19.30 hores): ‘Onomatohaikus’, de García de la Cuesta, y ‘Una época para olvidar’, de José Luis Valladares.

Na semeya, los congresistes de la Vagamar observen l'actuación de la Banda Gaites de Castrillón nel patiu del Antiguu Institutu.