La Universidá refuga la inscripción d’una tesis n’asturianu

Una notificación firmada pol mesmu rector Juan Vazquez ratificó la voluntá que yá espresare la institución académica de nun aceptar testos n'asturianu la primer vegada que'l doctorandu intentó presentar la so tesis en rexistru de la universidá'l pasáu mes d'abril. Naquella ocasión, y un informe xurídicu nel que sí se concedía la gracia de poner el títulu del testu n'asturianu, la institución académica obligaba a presentar copia en castellanu del testu de la tesis al historiador Faustino Zapico, que yá lleere l'añu pasáu la tesina n'asturianu na facultá d'historia.

L'argumentación de los servicios xurídicos de la Universidá teníase pa ello nel calter de llingua non oficial del asturianu. El dictame de la Universidá dába-y al doctorandu un plazu de diez díes pa "rectificar" y otru de trenta pa poner recursu, cosa que fizo Faustino Zapico apelando a la esistencia d'otros trabayos doctorales que nun alcontraron problemes por presentase n'asturianu. El doctorandu facía referencia a una memoria de tesis doctoral sobre la fala de Trubia que se presentó n'asturianu ensin alcontrar problema nengún, mientres que tamién esisten delles tesis doctorales que se lleeron n'asturianu nel so día, la práctica totalidá de les mesmes pertenecientes a la facultá de filoloxía.

Tres d'esta segunda refuga, firmada espresaente pol Rector Juan Vázquez, Faustino Zapico ta acabante de poner el casu en anes de la Xunta Pola Defensa de la Llingua Asturiana, que declaró que va entamar midíes "contra esta decisión" y "contra'l Rector Juan Vázquez".