La Universidá d'Uviéu vénde-y el proyectu Aulanet al G9

Les universidaes del Grupu 9, qu'enxerta a les universidaes publiques de Baleares, Euskadi, Navarra, Cantabria, Estremadura, La Rioxa, Aragón y Castiella La Mancha y nel que tamién ta la Universidá d'Uviéu, anunciaron la creación d´una plataforma conxunta d´enseñanza virtual que va tener de referente la esperiencia de la Universidá d´Uviéu con AulaNet. Esti proyeutu ta empobináu a aprovechar les ventayes de les nueves tecnoloxíes y aplicales a la enseñanza a distancia.



La razón d´entamar cola so propia plataforma tecnolóxica nun ye otra que la xuba del preciu de la plataforma Web-CT qu'usen anguaño. Amás la bona esperiencia de la collaboración ye una bona base pa dar un pasu alantre na xera de la enseñanza electrónica (e-learning) de calter universitariu. De toles maneres el mayor coste del proyeutu nun ye´l diseñu de la plataforma tecnolóxica sinón la formación del profesoráu pal usu de estes ferramientes informátiques. El coste del proyeutu va repartise ente toles universidaes del Grupu, que tamién cuenta con comercializar el programa informáticu d´enseñanza virtual más en p'alantre.



El proyeutu asturianu AulaNet va ser el sofitu del proyeutu del Grupu 9 no que se refier a los aspectos técnicos. La ferramienta informática astur permite trabayar nun entornu Microsoft Office siendo compatible al empar col Linux. Facer un consorciu cooperativu ye la fórmula que tan estudiando para entamar esti ambiciosu proyeutu educativu en que la Universidá d´Uviéu pue ser clave nel desarrollu técnicu.