La Universidá d’Uviéu va poner en marcha una Cátedra de Lliteratura Asturiana’l cursu qu’entra

La llectura d’una declaración institucional de la Universidá d’Uviéu por mor de la Selmana de les Lletres Asturianes por parte del rector Ignacio Villaverde vieno acompañada de l’anuncia de la creación d’una Cátedra de Lliteratura Asturiana’l cursu qu’entra. Un Área de Filoloxía Asturiana y el maior tán tamién ente los planes de la institución.

Un conveniu firmáu cola Conseyería de Cultura, Política Llingüística y Turismu, representada na tarde d’ayeri na sala de prensa de la Universidá d’Uviéu pola so responsable, Berta Piñán, va permitir que la cátedra sía una realidá. Esti pasu permitirá l’entamu d’actividaes y programaciones centraes na nuesa lliteratura que-y dean visibilidá.

La vieya reclamación de la creación del Maior de Llingua Asturiana tamién ta, según apuntó Villaverde, ente los sos planes. Anguaño los estudios reglaos son un Mínor, de llibre escoyeta pa los alumnos de cualquiera de los graos de Filoloxía, que se reduz a 48 creitos y 8 materies.

El Maior supondría un avance pa l’enseñu del idioma na universidá, yá que pasaría a tener 120 creitos y reconocimientu na so titulación de grau. El procesu pa qu’esti cambiu sía una realidá ye, según confirmó Villaverde, llargu, yá que tien que pasar per Madrid al conllevar un cambiu de los planes d’estudiu.

Tamién al Conseyu d’Universidaes ha dir el tercer avance previstu pola institución con respeuto al idioma: un Área de Conocimientu de Filoloxía Asturiana. Sicasí, la so creación supón un trámite más rápidu y cenciellu, polo que s’espera que pronto pueda tar en marcha.

Dexar de ser motivu de conflictu

“La Universidá d'Uviéu, enraigonada na sociedá asturiana y comprometida cola reconocencia y desenvolvimientu de la nuesa cultura y de la nuesa comunidá, desempeña un papel principal y relevante na promoción, el caltenimientu y l'espardimientu de la llingua asturiana, procurando asitiase al marxe de discutinios venceyaos a posiciones polítiques o personales, ayenes tanto a la nuesa responsabilidá institucional como a la naturaleza y característiques de la llingua mesma”, entama la declaración institucional fecha pública ayeri, que fai referencia al artículu sestu de los sos estatutos.

Villaverde espresó que “acordies con esti mandatu estatutariu, consideróse preciso dir más allá del obligáu cumplimientu y asumir un papel activu y propositivu tomando como referencia la Llei 1/1998, de 23 de marzu, d'Usu y Promoción del Bable/Asturianu”, qu’afita a la institución universitaria como “muérganu consultivu competente na capacitación docente y la investigación llingüística y filolóxica”. “Ye voluntá de la Universidá d'Uviéu siguir cumpliendo dafechu con estes responsabilidaes”, confirmó.

“El proyectu del equipu rectoral, como se recueye nel programa que cuntó cola mayoría del sofitu universitariu, parte del convencimientu de que la llingua y la cultura asturianes tienen de dexar de ser un motivu de tensión y conflictu. L'asturianu nun tien de ser entendíu como una ‘cuestión’ y nun tenemos d'abonar una visión agónica y conflictiva de la llingua y de cultura asturiana dientro del senu de la universidá”, aseguró.

Pa finar, la declaración rescampla que “l'asturianu, como llingua y bien académicu y cultural, ye parte de la universidá asturiana; pal cumplimientu cabal de los nuesos compromisos institucionales al respectu ye abondo tomar bien en serio el valiosu patrimoniu que representa, cumpliendo la llei como institución y alministración pública que somos y tamién sofitando y fomentando la so conocencia y la so valoración social por aciu d'una apuesta firme pola investigación y la docencia, d'alcuerdu cola naturaleza propia de una institución universitaria”.

Esti posicionamientu por parte del rector llega selmana y media depués d’unes pallabres nel Claustru nes que dexó entever que l’usu del asturianu por parte de la institución suponía “adoptar una posición ideolóxica”. Villaverde apuntó que nun supo espresase de manera afayadiza y llamentó la polémica que se xeneró al rodiu d’esa intervención.