La Universidá d’Uviéu nun quier tesis n’asturianu

La Universidá d'Uviéu refuga, con un informe xurídicu, la presentación de la memoria de tesis doctoral del historiador Faustino Zapico, al qu'obliga a presentar copia en castellanu del testu.

L'historiador Faustino Zapico, conocíu tamién pol so papel políticu al frente d'Izquierda Asturiana, ta acabante de ver como la Universidá d'Uviéu-y refuga la solicitú que ficiere pa presentar la so tésis doctoral sobre'l carlismu n'Asturies. Faustino Zapico, que yá leere l'añu pasáu la tesina n'asturianu na facultá d'historia, topó al llevar la tesis definitiva a les altes instancies de la burocracia universitaria con torgues que posiblemente van impedir que se presente finalmente n'asturianu la so tesis.

El conflictu llingüísticu cola Universidá saltó nel momentu en que'l doctorandu presentó la memoria pa inscribir la so tesis nel rexistru de la institución. L'organismu universitariu respondió-y a Zapico con un informe nel que dicía que, anque'l títulu de la tesis podía dir n'asturianu, el testu de la mesma había presentase polo menos acompañáu d'una copia en castellanu. L'argumentación de los servicios xurídicos de la Universidá tiense pa ello nun puntu decisivu, que ye'l calter de llingua non oficial del asturianu. El dictame de la Universidá dába-y al doctorandu un plazu de diez díes pa "rectificar" y otru de trenta pa poner recursu, cosa que Zapico ta acabante de facer.

Según comentó Faustino Zapico a Asturies.com, nel recursu interpuestu énte'l rector sorráyase la esistencia d'otros trabayos doctorales que nun alcontraron problemes por presentase n'asturianu. El doctorandu fai referencia a una memoria de tesis doctoral sobre la fala de Trubia que se presentó n'asturianu ensin alcontrar problema nengún, mientres que tamién esisten delles tesis doctorales que se lleeron n'asturianu nel so día, la práctica totalidá de les mesmes pertenecientes a la facultá de filoloxía.