La Universidá d'Uviéu quier roblar convenios pa que los sos alumnos puedan facer práutiques en China

La Universidá tien como ún de los sos oxetivos pa la meyora del Campus d’Escelencia la firma d’un conveniu pa que los sos alumnos faigan práutiques n’empreses en China. La institución pide al ministeriu 3 millones pa ésta y otres actuaciones.
 
La vicerrectora Paz Suárez Rendueles, responsable del desarrollo del Campus, acompañada del rector de la Universidá d’Uviéu, Vicente Gotor, señaló ayeri en rueda de prensa que van solicitar al Ministeriu d’Educación y Ciencia 3.101.000 d’euros pa financiación adicional del Campus d’Escelencia Internacional (CEI). En xeneral, l’oxetivu ye’l “fortalecimientu” con llinies d’actuación enfocaes pa la consolidación del Campus, con un presupuesto de 2.130.000 euros. Pa la collaboración público-privada, la institución académica asturiana reclama 971.000 euros.
 
La convocatoria pal 2011 del ministeriu identifica siete árees prioritaries de financiación pa la meyora del Campus d’Escelencia: Internacionalización; Escelencia Académica; Coordinación nel ámbitu d’Educación Superior; Gobernanza y xestión del CEI: Emprendimientu y desarrollu teunolóxicu; Creatividá; y Escelencia dirixida al entornu. Nel casu de la Internacionalización, la Universidá quier favorecer la collaboración coles universidaes chines mediante convenios pa que los estudiantes asturianos puedan facer práutiques n’empreses instalaes nel país asiáticu. Nesi sen, Gotor insistió na apuesta de la institución académica pola movilidá y los idiomas.
 
Dalgunes de les otres midides que se quieren poner en marcha son l’adecuación de los edificios pa persones con discapacidaes y una aición conxunta na Universidaes del G9 pa compartir práutiques universitaries. N’opinión de Rendueles, “quiximos buscar un equilibriu” ente los distintos bloques como la internacionalización, la investigación, la ordenación académica y les infraestructures.