La Universidá asturiana foi la que más estudiantes perdió nel cursu 05/06

Les universidaes españoles rexistraron nel so conxuntu nel cursu 2005 - 2006 una matriculación de 1.422.561 estudiantes, un númberu que supón una mengua del 1,8% respective al cursu anterior y que confirma la tendencia a la baxa que se vive dende l'añu 2000/2001 por causa de la baxada demográfica.

Acordies colos datos asoleyaos pol INE, la baxada en númberu d'estudiantes conocióse más nes universidaes de Galicia , con un -4,2% de matriculación) y País Vascu, con un -4,7%, pero sobremanera n'asturiana, que foi la que más estudiantes perdió sobre'l cursu anterior con una baxada de matriculación del 4,93%. La población universitaria asturiana baxó asina de los 31.000 estudiantes del cursu pasáu a los 29.473 d'esti. No tocante a los estudios que se faen, el 48,6% de los estudiantes escoyeron en estudios de Llicenciatura, pero esta triba de titulaciones universitaries tan perdiendo puxu, rexistrándose una mayor popularidá de les diplomatures.