La Unión Asturianista va estrenase con Marqués de candidatu

El mesmu Xuan Xosé Sánchez Vicente encargóse de desfacer la incógnita sobre la candidatura d'Unión Asturianista, que va encabezar quien designe la URAS. Sánchez Vicente declaró qu'elli mesmu "contaba con qu'esa persona fuere Sergio Marqués". Sánchez Vicente esplicó que'l puestu de salida na candidatura alternaríase socesivamente ente los dos partíos, lo mesmo a nivel autonómicu que nos conceyos, de manera que si nuna convocatoria'l primeru de la llista fuere un candidatu del PAS, nes siguientes elecciones tendría de ser ún de la URAS y al revés. D'otra manera, el dirixente históricu del PAS xustificó la creación de UA como un camín pa "superar el sentimientu de derrota y progresiva decadencia de la sociedá asturiana" y sorrayó la voluntá de continuidá del alcuerdu al definilu como "un matrimoniu a l'antigua"

Marqués pronunció lo más intenso del discursu. El que fuere presidente d'Asturies ente'l 95 y el 99 col PP refugó la idea de qu'UA seya un "intentu de francotiradores electorales" y declaró la voluntá de collaboración de les dos fuerces más allá del planu electoral más inmediatu de les autonómiques del 2007 nun apueste de futuru. Sergio Marqués dio un discursu en que llamó a poner los "intereses d'Asturies como primer oxetivu del llabor a realizar", esplicando qu'UA quier axuntar voluntaes baxo un programa común "progresista, de centru, lliberal y, sobre too, asturianu independientemente de la ideoloxía de caún y non facer namás qu'asturianismu de gaita y tambor". El dirixente de la URAS, que gastó un tonu muncho más sentimental que'l del so compañeru de coalición, declaró que llegaría un momentu en que tolos asturianos tendríemos de preguntanos "qué ficisti tu por solventar la situación d'Asturies"

Asturies.com ufierta a los sos llectores la posibilidá d'escuchar los discursos íntegros de Xuan Xosé Sánchez Vicente y de Sergio Marqués nel actu de presentación d'Unión Asturianista. El testu completu del alcuerdu PAS-URAS yá ta disponible na web del Partíu Asturianista