La Unión Europea manda pesllar la campaña del bocarte

La Comisión Europea decidió ayeri'l pieslle de la pesca del bocarte en tol Cantábricu, dempués de confirmase que la biomasa d'esta especie asítiase nes 18.640 tonelaes, mui perbaxo del mínimu encamentáu pa permitir la pesca de 28.000 tonelaes. El pieslle va ser efectivu a lo llargo de seyes meses nos que los pescadores afectaos van recibir ayudes del Fondu Financieru d'Orientación de la Pesca (IFOP).

Les cofradíes de pescadores asturianes recibieron l'anuncia con contentu, anque'l so presidente Dimas García llamentó que la veda llegaba tarde y que nun s'espurriere más nel tiempu hasta la primavera del añu qu'entra como mínimo, col oxetivu de poder conocer la recuperación real de la biomasa de bocarte. Francia foi'l país más roceanu a que se tomare esta decisión, declarando'l so ministru de pesca Dominique Bussereau, que Francia va intentar que s'entorne'l pieslle del caladeru. Dimas García declaró nesti sentíu que los barcos franceses, qu'empleguen técniques de pesca más de fondu que los asturianos, yá escosaren les 5.000 tonelaes que teníen conseñaes pa esti añu 2006.