La UE tramita una denuncia d’IAS sobre la llinia Soto-Penagos

La Secretaría Xeneral de la Comisión Europea en Bruseles unvió escritu oficial a Izquierda Asturiana (IAS) dándo-y anuncia de l'almisión a trámite de la denuncia que presentare esti partíu políticu y na que s'acusaba a Rede Eléctrica, empresa promotora de la llinia d'alta tensión ente Soto Ribera (Asturies) y Penagos (Cantabria) d'incumplimientu de normatives comunitaries. La UE dio parte de qu'entama agora una fase d'investigación que pue llevar al aniciu de procedimientu d'infracción contra la empresa eléctrica

IAS diz na so denuncia que Rede Eléctrica Española y l'Estáu Español incumplen nel tendíu de la llinia sentencies de los mesmos Tribunales españoles, que llegaron a suspender cautelarmente les obres en dellos tramos de la llinia, y del Tribunal de Xusticia de les Comunidaes Europees que con fecha del 16 de setiembre del 2004 declaró l'incumplimientu del Reinu d'España de la Directiva 85/337/CEE por incumplimientu de la normativa sobre declaración d'impactu mediuambiental.

Amás d'esta denuncia, IAS tien presentada otra asemeyada énte la Comisión de Peticiones del Parlamentu Européu, al que se-y pidió que faiga pública una resolución sobre la indefensión de los ciudadanos afectaos, atendiendo a delles normatives comunitaries, ente elles la 97/11/CE y la 85/337/CEE. A la espera de recibir rempuesta d'esta segunda denuncia, el portavoz d'IAS Ignaciu Llope declaró qu'amás de nun someter la llinia a declaración d'impactu danse otres irregularidaes graves como son el fechu de qu'entamare la obra de la llinia y el que la empresa negocie pela so cuanta posibles cambeos de trazáu de la mesma con particulares y conceyos afectaos.

Ignaciu Llope fizo un llamáu a que la UE controle estes actuaciones énte la inoperancia de la mesma xusticia española y pidió-yos "a los sectores de la sociedá asturiana sensibles colos abusos de las compañíes eléctriques y con un modelu de desarrollu irracional y agresivu col mediu ambiente, a mestar esperiencies y reivindicaciones nos casos de les llinies d'alta tensiíon de Lada-Velilla y de Soto-Penagos.