La UE estudia les patentes de programes informáticos

Entama güei en Bruseles un congresu sobre la política europea de les patentes de software. El congresu, organizáu pola Eurolinux Alliance, quier que na UE nun se dexe patentar programes de la manera que ta faciéndose dende va años nos EUA y nel Xapón.

Ello ye que'l Software llibre ta convirtiéndose nun tema estrella de discusión nel panorama políticu mundial, mientres que n'Asturies el debate sobre esti asuntu sigue paráu. La primer moción que se presentó na Xunta Xeneral del Principáu sobre adopción de Software llibre n'alministración por iniciativa de la URAS votáronla en contra los dos grupos mayoritarios, PP y PSOE, siendo esti partíu pioneru n' Estremadura, onde tan adoptando'l sistema propiu Linex. El PP, que de mano tampoco nun apostaba por ello, ta tirando agora pol asuntu na Comunidá Valenciana, onde'l candidatu popular a la Presidencia de la Generalitat Valenciana, Francisco Camps, fizo va poco declaraciones públiques emponderando'l software llibre y reconociendo que quier que llegue a implantase. N'Asturies IU y URAS decidieron apostar por ello, aconceyando yá delles vegaes colos responsables d'Asturlilnux, anque foron otros grupos más minoritarios como IAS o Los Verdes los que s'encargaron d'introducir el debate, llegando a presentar los primeros mociones sobre usu de software llibre nos conceyos de Nava y Villaviciosa, que les dieron de pasu.