La UE entama una investigación pola llinia Soto - Penagos

La Comisión de Peticiones del Parlamentu Européu mandó-y esta selmana un escritu a l'agrupación piloñesa d'Izquierda Asturiana (IAS) nel que da anuncia del entamu d'una investigación sobre los fechos denunciaos por esta formación política al rodiu de les supuestes illegalidaes no tocante al derechu comunitariu en qu'incurren l'Estáu español y les alministraciones local y asturiana trazáu de la llinia d'alta tensión Soto-Penagos al so pasu pel conceyu de Piloña.

L'escritu de la eurocámara considera que los fechos denunciaos pol partíu políticu "entren dientro del ámbitu competencial européu" y da anuncia de que la denuncia d'IAS va amestase al informe añal qu'ellabora'l Parlamentu Européu sobre cumplimientu del derechu comunitariu por parte de los estaos miembros de la UE.

La organización denunciante, que yá consiguiere esti branu que la Comisión Europea tomare en consideración una denuncia asemeyada pola llinia d'alta tensión qu'atraviesa l'oriente asturianu pa llegar hasta Cantabria, diz nel comunicáu en que comunica l'entamu d'investigaciones por parte de la UE que les últimes informaciones sobre posibles cambeos de trazáu que diere a conocer l'Alcalde de Piloña, qu'anunciare "un alcuerdu ente Rede Eléctrica Española, promotora de la llinia, y el conceyu" son "más de lo mesmo y constituyen un nuevu capítulu na tomadura de pelo a la ciudadanía" Según afirma IAS nel so comunicáu "REE nun tien nada que negociar con conceyos nin con particulares, lo que tien de facer ye cumplir la lei, tanto española como comunitaria".

Izquierda Asturiana (IAS), que lleva tiempu oponiéndose al trazáu de la llinia con diverses campañes, sobremanera al pasu del trazáu pel conceyu de Piloña, diz que se congracia pola noticia al empar que sorraya'l so compromisu cola ciudadanía y los afectaos pa torgar definitivamente un proyectu que, en caso de facese, va suponer una "hipoteca perpétua pa la xente, pal patrimoniu históricu y los valores naturales y paisaxísticos". Más allá de los efectos inmediatos de la llinia sobre'l mediu ambiente, IAS denuncia que "Soto-Penagos nun ye otro qu'un tentáculu más, lo mesmo que Lada-Velilla nel que s'enconta un apueste enerxéticu especulativu de los responsables políticos asturianos que pretende duplicar la capacidá de producción na nuestra comunidá, que yá ye altamente escedentaria, ensin suponer nin riqueza, ni emplegu nin valor añadíu, cenciellamente suciedá y estrozu para munchos años por unos meses d'obra pública".

L'almisión de la denuncia d'IAS por parte del Europarlamentu vien dempués de qu'esti branu la Comisión Europea almitiere una denuncia asemeyada d'esti mesmu partíu contra la llinia, colo qu'agora son yá dos instancies europees les que tan analizando les posibles illegalidaes del trazáu.