La UE da de pasu'l mercáu de la contaminación

La Unión Europea, qu'estos díes centra l'atención informativo a cuenta de los insultos ente Berlusconi y los demás diputaos de la cámara comunitaria, dio de pasu ayeri la directiva nueva sobre emisiones de gases contaminantes a l'atmósfera. L'oxetivu d'esta normativa ye que les industries europees vayan poniéndose acordies a la lletra del famosu Protocolu de Kyoto, pol que la UE comprometiose a tener, nel añu 2012 un 8 % menos d'emisiones que nel añu 1990.

Sicasí, esta normativa va muncho más allá de ser una cenciella regulación de les emisiones, y introduz conceptos de mercáu nel vertíu de contaminantes al mediu. Ello ye que les empreses van tener un volume de contaminación permitíu y, en pasándolu van poder mercar "cuota" de contaminación a otres empreses que nun llegaren al tope que teníen consentíu. La complicadísima regulación d'esti mercáu va permitir tamién el mercar derechos de contaminación a otres empreses de fuera de la UE. Más información nesti enllace en que s'espliquen los pormenores d'esti nuevu "mercáu de la contaminación"

La normativa afecta al sector enerxéticu (electricidá y refineríes) y a delles industries como la siderurxa, el cementu, papel, vidriu y minerales, pero trátase de dir llevándola a otres industries como los plásticos o l'aluminiu. En total son sobre 10.000 les empreses europees que van tener qu'adaptase pa menguar la tasa de contaminación, un esfuerzu que les patronales españoles calculen que va sali-yos por cerca de 1.000 millones d'euros al añu.