La UE apreba la entrada de más tresxénicos

Esta selmana, la Unión Europea llevantó la moratoria que dende 1998 regulaba l'emplegu de plantes tresxéniques nel territoriu de la Unión Europea. Darréu d'ello, la Comisión dio de pasu una nueva frasca de maíz tresxénico, el BT 11, un maíz que refugaron los ministros de Francia, Austria, Lluxemburgu, Dinamarca, Portugal y Grecia. La decisión comunitaria tien llevantáu n'armes al movimientu ecoloxista de tou'l continente y a bien de sindicatos agrícoles. Greenpeace y el sindicatu Coag-Asturies son dos d'estes organizaciónes que nun traguen cola nueva normativa comunitaria

El sindicatu agrariu COAG-Asturies emitió ayeri un comunicáu criticando la decisión de la Comisión Europea que permite la importación d'una nueva frasca de maíz tresxénico, el yá famosu "BT-11. COAG condenó que seretirare la moratoria sobre tresxénicos y que se diere de pasu la entrada d'un cereal, el BT-11, que nun tien el preste del Conseyu de Ministros d'Agricultura de la UE. COAG ve que sigue ensin haber un marcu llegal nel que pudieren implantase estos cultivos con un mínimu de garantíes, y tien pa ella que'l riesgu de que'el material tresxénico contamine los cultivos convencionales y los ecolóxicos ye causa abonda pa siguir cola moratoria

Pela so parte, la organización ecoloxista Greenpeace tamién condenó la decisión oficial. Greenpeace criticó que la UE, que ta pa defender los intereses de los consumidores, defenda agora los de les empreses agrobiotecnolóxiques y de los grandes agricultores estadounidenses". Con too y con ello, Greenpeace manifestó que nun cuenta con que'l BT 11 vaya llegar a les baldes de los supermercaos, ello pola refuga que xeneren los tresxénicos nos consumidores europeos y pol compromisu en firme de munchos supermercaos y productores d'alimentos de nun vender nin fabricar con estos cereales.

El maíz Bt-11, que ta nel noyu de la polémica, ye una creación de la casa Syngenta que dende güei tien l'honor de ser el primer tresxénicu qu'apreba la UE dende 1998. Bt-11 tien unaalteración que permite a la planta producir una toxina que n'estáu natural namás se da en bacteries. Esta característica pue tener "efectos imprevisibles" qu'entovía tan ensin evaluar. Greenpeace pidi-yos a los estaos que votaron contra'l BT-11 que lu prohiban dientro de les sos llendes, acordies a lo que permite l'artículu 12 de la normativa sobre Nuevos Alimentos de la UE.