La UE alvierte de los efectos del cambéu climáticu

L'Axencia Europea de Mediu Ambiente, órganu dependiente de la UE ta acabante d'espublizar un informe sobre los efectos del cambéu climáticu que confirma los escenarios más pesimistes en cuestión de recalentamientu global.

L'informe "Efectos del cambéu climáticu n'Europa" resume los efectos que va tener el calentamientu global a lo llargo del sieglu XXI. Tormentes, inundaciones, seques y otres condiciones meteorolóxiques estremes van ser fenómenos a los que cada añu vamos tar más avezaos n'Europa.


L'informe preve más agua pal norte d'Europa pero un tiempu más secu nel sur del continente, lo que llegaría a amenazar l'agricultura en bien de llugares. Ente los efectos más espectaculares, l'informe da por fecha la desapaición de les tres cuartes partes de los glaciares de los Alpes suizos nun horizonte de menos de cincuenta años, acelerando'l procesu pol que yá perdieron una cuarta parte del so volume ente 1850 y 1980. L'informe organízase alredor de 22 indicadores que se clasifiquen n'ocho grandes categoríes: atmósfera y clima; glaciares, nieve y xelu; sistemes marinos; ecosistemes terrestres y biodiversidá; agua; agricultura; economía y salú humano, y, según anuncia l'AEMA, en casi tolos indicadores apréciase una tendencia clara na que yá s'observen los efectos del cambéu, y too ello per aciu de la obra humano y les emisiones de gases contaminantes.

Pal casu concretu d'Asturies la perspectiva d'equí al últimu cuartu del sieglu ye la d'un recalentamientu superior a la media. Según los datos de la UE, contra un calecimientu global de 0,7º nel sieglu XX, Europa recalentó mas que la media planetaria, con 0,95º, y esti calecimientu acusóse más en Rusia y na península ibérica, na qu'acordies colos datos del informe, 'una xuba d'alredor de cuatro graos centígrados y en nengún casu de menos de 2 graos. La gráfica que pue vese na imaxe qu'acompaña a esta información espeya la reconstrucción de les temperatures medies del continente nel últimu mileniu y la proyección d'hipótesis pa los 100 años próximos.

L'informe "Efectos del cambéu climáticu n'Europa" pue descargase de baldre na web de la AEMA (formatu pdf)