La UABRA va tratar de completar ocho programes formativos na edición próxima tres l'ésitu d'esti añu

Xosé Antón González Riaño, direutor de la Universidá Asturiana de Branu (UABRA), amuesa la so satisfaición pol desendolcu de la cuarta edición de los cursos con sede en Cangas. Pa la edición próxima espera completar ocho programes formativos.

“Los dos aspeutos más destacaos d’esta cuarta edición de la UABRA son la cantidá d’alumnos participantes y el fechu de conseguir cubrir los seis programes formativos, xunto cola calidá grande de les cuatro conferencies celebraes”, afirma González Riaño. Sobre lo primero, el direutor recuerda que los cursos, con 170 participantes, de los que 120 foron alumnos, tán cerca de sobrepasar la so capacidá, pero se pon como meta aumentar en dos los programes formativos de los ‘Cursos d’Afondamientu Cultural y Llingüísticu’ “d’una enorme calidá llingüística” que tan bona aceptación tienen dende la so creación. D’esta forma, llegaríanse a los ochos programes. “Más yá nun sería afayadizo por cuestiones organizatives”, apunta l’académicu, que vería la manera de siguir medrando na ampliación de les xeres abiertes y complementaries de la UABRA. Al respeuto, empondera les conferencies impartíes por Ignaciu Llope, Pedro Farias Arquer, Ricardo Saavedra Fernández-Combarro y Cristóbal Ruitiña, que trataron n’asturianu o gallego-asturiano temes diversos como la salú mental de los asturianos, la recuperación de les esplotaciones a cielu abiertu, la ironía como rasgu común propiu o’l papel de los medios de comunicación na rexeneración democrática.

La consolidación de la collaboración del Conceyu de Cangas del Narcea cola UABRA ye otra de les cuestiones que recalca González Riaño y que garantiza un bon futuru pa esta iniciativa de l’Academia de la Llingua Asturiana (ALLA), na que tamién participa la Universidá d’Uviéu. “Tanto l’alcalde como la conceyala de Cultura amosaron estos díes otra vuelta’l so apoyu a la UABRA”, señala’l so direutor.

Los cursos

Esti añu, la UABRA tuvo llugar ente’l 29 de xunetu y el 9 d’agostu en Cangas del Narcea, en concreto na Escuela-Hogar, como residencia, y nel IES Cangas del Narcea, como sede de los cursos. Como ye vezu, impartiéronse los tradicionales ‘Cursu elemental de Llingua Asturiana’, ‘Cursu Avanzáu de Llingua Asturiana’ y el ‘Cursu de Gallego-asturiano (primeira fase)', a los que se sumen seis d’Afondamientu Cultural y Llingüísticu: ‘Capacitación pa la traducción al asturianu’, a cargu de Cristina Valdés Rodríguez; ‘Escuela y anovaciones n’Internet’, coordináu por David Melendi Palacio; ‘Xuegos y tradiciones populares asturianes’, empobináu por Roberto González-Quevedo González; ‘Xestión cultural n’Asturies: xestionando llingües y cultures’, con Isabel Hevia Artime como profesora; ‘El Navia-Eo: espacio, cultura y futuro’, que va impartir José Antonio Fernández Vior; y ‘Asturies y la so historia recién’, dirixíu por Rubén Vega García.

Amás, xunto a les cuatro conferencies nel salón d’actos del institutu llocal, entamóse nel Teatru Toreno la representación de la obra ‘Planeta Joselín’ y la proyeición de la versión asturiana de ‘Charade’, a cargu de Gonzali Producciones, que s’estrenó en Cangas. Completó les xeres abiertes y complementaries de la UABRA la esposición ‘Muestra de traxes tradicionales asturianos’, organizada pol Grupu de Baille San Félix de Candás, que tuvo como sede la Casa la Cultura.