La UABRA entrega esti vienres los diplomes a los alumnos participantes

El paraninfu de la Universidá d’Uviéu va acoyer esti vienres el pieslle oficial de la Universidá Asturiana de Branu (UABRA). Los alumnos participantes nos cursos van recibir los diplomes y certificaos acreditativos.

Vicente Gotor, rector de la Universidá d’Uviéu, va tar presente nesti actu xunto cola presidenta de l’Academia de la Llingua Asturiana (ALLA), Ana María Cano, y l’alcalde de Cangas del Narcea, José Luis Fontaniella. Los trés van intervenir nesti pieslle oficial, que va principiar a les 19 hores, y van encargase de repartir los diplomes y certificaos acreditativos a los más de cien alumnos que participaron y superaron los cursos.

La tercer edición de la UABRA tuvo llugar na Escuela-Hogar de Cangas del Narcea ente’l 30 de xunetu y el 10 d’agostu cola celebración de los tradicionales cursos ‘Elemental de Llingua Asturiana’, ‘Avanzáu de Llingua Asturiana’ y ‘Capacitación en Gallego-asturiano’. Amás, impartiéronse cuatro d’afondamientu cultural y llingüísticu: ‘Capacitación pa la traducción al asturianu’, ‘Internet y escuela. Nueves aplicaciones socioeducatives’, ‘Ecoloxía y Mediu Ambiente n’Asturies’ y ‘Cantares, bailles ya instrumentos musicales asturianos’.