La UABRA abre les sos puertes en Cangas con tolos cursos cubiertos

La Universidá Asturiana de Branu (UABRA), qu’abre les sos puertes esti llunes en Cangas del Narcea, continúa medrando añu tres añu. Esta edición ye la primer que consigue cubrir tolos cursos y caltién una participación de 170 persones.

“Ye la más completa de toes” señala Xosé Antón González Riaño, direutor d’esti proyeutu de l’Academia de la Llingua Asturiana (ALLA) que sal alantre col sofitu de la Universidá d’Uviéu y del Conceyu de Cangas del Narcea, llugar onde se celebra hasta’l 9 d’agostu, en concreto na Escuela-Hogar, que sirve de residencia, y nel IES llocal, sede de les clases. L’académicu destaca’l fechu de que, per primer vez, tolos cursos ufiertaos salen alantre y sitúa’l númberu de participantes en 170 persones, de los que 120 son alumnos y el restu profesores, conferenciantes y persones que participen nes actividaes paraleles a los cursos. “Caltener estos númberos cola situación de crisis y axustes ye un ésitu”, añade González Riaño. La inauguración de la UABRA va tener llugar a les 13 hores nel nel salón d’actos de la Casa de la Cultura Palaciu d’Omaña y nella, amás del direutor, van tar presentes la direutora xeneral de Política Llingüística, Ana María Fueyo Llaneza; el direutor de la Estaya d’Estensión Universitaria de la Universidá d’Uviéu, Leopoldo Sánchez Torre; la presidenta de l’ALLA, Ana María Cano González; y l’alcalde del Conceyu de Cangas del Narcea, José Luis Fontaniella Fernández.

Nesta cuarta edición de la UABRA van desendolcase los yá tradicionales ‘Cursu elemental de Llingua Asturiana’, ‘Cursu Avanzáu de Llingua Asturiana’ y el ‘Cursu de Gallego-asturiano (primeira fase)', a los que se sumen seis d’Afondamientu Cultural y Llingüísticu. Asina, na primer de les dos selmane llectives, va impartise ‘Capacitación pa la traducción al asturianu’, a cargu de Cristina Valdés Rodríguez; ‘Escuela y anovaciones n’Internet’, coordináu por David Melendi Palacio; y ‘Xuegos y tradiciones populares asturianes’, empobináu por Roberto González-Quevedo González. Mientres, del 5 al 9 d’agostu, van tener llugar ‘Xestión cultural n’Asturies: xestionando llingües y cultures’, con Isabel Hevia Artime como profesora; ‘El Navia-Eo: espacio, cultura y futuro’, que va impartir José Antonio Fernández Vior; y ‘Asturies y la so historia recién’, dirixíu por Rubén Vega García.

Actividaes paraleles

Los alumnos que participen nos cursos, asina como la población canguesa, tamién van disfrutar d’otres munches actividaes de baldre mientres estes dos semanes. Asina, dende güei ta abierta al públicu na Casa de la Cultura llocal la esposición ‘Asturies n’otra dómina. La ropa', entamada pol Grupu de Baille San Félix de Candás. El Teatru Toreno, pela so parte, va acoyer esti miércoles la representación de ‘Planeta Joselín’, mientres que’l próximu, día 7, va ser sede de la estrena del doblaxe al asturianu de la película ‘Charada’, entamada por Gonzali Producciones. Les dos actividaes van principiar a les 22.30 hores.

Como ye vezu na UABRA, les conferencies tamién van ocupar un sitiu protagonista. Asina, pa esti añu ta prevista la participación d’Ignaciu Llope, sobre salú mental (mañana); Pedro Farias, sobre industria y ecoloxía (xueves); Ricardo Saavedra, en gallego-asturiano, sobre la ironía nos asturianos (martes 6); y Cristóbal Ruitiña, sobre el papel de la prensa (xueves 8). Tolos actos van tener llugar nel IES de Cangas del Narcea y van principiar a les 19 hores.