La TV balear va ser billingüe

A pocos meses de la estrena de la canal autonómica asturiana de TV, prevista pal 8 de setiembre, ayeri echó a andar la canal de TV de les Baleares, IB3, con emisiones billingües en catalán y castellanu. Nes Baleares hai polémica con ello.

Coincidiendo col día de la comunidá autónoma balear, IB3 fizo la so puesta de llargo con 5 hores de programación qu'incluyeron el primer telefilm de producción propio en catalán"L'amo de Son Quint" un dramón rural,y la película americana "Otoño en Nueva York" filme protagonizáu por Richard Gere que s'estrenare en catalán pa la televisión pero que IB3 refugó emitir nesa llingua porque les películes van ser en castellanu. Estos dos casos espeyen el modelu de billingüismu de l'acabante nacer IB3, mui cuestionáu dende postures de defensa de la llingua catalana.

Ello ye que l'usu del catalán na canal balear vien siendo oxetu d'una polémica encesa nes islles. Los grupos de defensa del catalán proponíen una TV en catalán dafechu, pero'l gobiernu del PP encabezáu por Jaume Matas tiró por una TV que va espresase nun "billingüismu natural" como lo calificó la mesma presidenta del ente María Umbert. De momentu, les emisiones de la canal IB3 van ser en réxime de prebes hasta'l mes de setiembre, pero'l debate sobre'l modelu llingüísticu de la TV balear centra muncho del debate sobre la mesma. De momentu prométese especial protagonismu pal catalán nos informativos y nos espacios infantiles, amás d'otros conteníos culturales en catalán.

Ello nun dexa contentos a los defensores del catalán, que ficieron una concentración de protesta énte la sé de la canal de TV en protesta pol usu probetayu del idioma qu'entienden que va tener la TV y tamién porque la so emisión tapa dafechu la frecuencia de la segunda canal catalana C33, que se recibía hasta agora nes islles y que tenía'l preste del públicu. Otros aspectos, como la llegada a la canal autonómica de periodistes como Carlos Dávila o Fernando Schwartz o'l fechu de qu'IB3 va potenciar un catalán estráu de localismos en cuenta de mandase por un modelu más estandar tampoco nun se ven bien dende postures autonomistes y nacionalistes.

Na presentación de la TV va agora un añu diérase anuncia de que'l catalán diba ser la llingua vehicular de la televisión autonómica de les islles Baleares según un alcuerdu de consensu al que llegaren el PP y Unió Mallorquina pal desarrollu del Ente. D'aquella dixérase qu'otru de los oxetivos del Ente de Radio y Televisión de Baleares diba ser el de la potenciación de la industria audiovisual nel archipiélagu, promocionándose llinies de producción industrial audiovisual y tamién al sector del doblaxe. Esto caltiense, garantizando la directora del ente Maria Umbert ayeri na presentación que'l 70% del conteníu de la TV va ser fecho nes Baleares, pero la forma en que va facese tamiém merez la crítica d'espertos qu'atalanten que la producción va dir al traviés d'un réxime de subcontratación que va favorecer a filiales de grandes grupos de comunicación.

En cuantes a los conteníos temáticos de la programación, xunta los "estandar" propios d'una TV xeneralista, la canal balear, con oficines en Mallorca, Menorca y Ibiza y una unidá informativa permanente en Formentera, promete tener un procuru especial na tresmisión de competiciones de deportes autóctonos y tradicionales de les Baleares. Na programación cultural va espardese tamién el trabayu creativu de los artistes y intérpretes de la Comunidá Autónoma, col enfotu de que la canal seya un axente tresmisor y dinamizador de la vida cultural balear.

Más información en:
Obra Cultural Balear,
Diari de Balears,
Tot Mallorca