La TV autonómica nun va emitir el 8 de setiembre

La TV asturiana nun va tar en condiciones d'emitir el Día d'Asturies, como reconocieron ayeri los responsables del Ente, qu'apuntaton a los problemes d'antenización como'l problema técnicu que-yos llevó a retrasar l'aniciu de les emisiones.

El Presidente asturianu Vicente Álvarez Areces espresare delles vegaes el deséu de que l'autonómica entamare les sos emisiones colos actos oficiales del Día d'Asturies, pa lo que llegó a pensase en contratar un equipu particular, pasando dempués d'esa fecha l'autonómica otra vuelta a emisión en prebes hasta que tuviere en condiciones de funcionar con normalidá na primavera del 2006. El director del Ente José Ramón Pérez Ornia yá esplicare delle vegaes que lo del 8 de setiembre yera un enfotu personal d'Álvarez Areces más qu'una posibilidá real.

Ello ye que pal 8 de setiembre l'autonómica diba tar en condiciones d'emitir con calter escepcional, pero diben ser mui pocos aparatos de tv los que diben poder sintonizala. L'enfotu de los responsables de la TV ye'l de llegar a tolos llugares posibles, y pa qu'eso llegue a dase ye preciso facer prebes intensives de la cobertura de la señal en tolos conceyos. Mientres los usuarios de Telecable van tener l'autonómica enxerta na parriya de programación dende l'entamu de les emisiones, los usuarios d'antena van tener seguramente que reenfocala o amplificar la señal.