La Travesera: 74 quilómetros y 6.560 metros de desnivel positivu per Picos

La salida de la carrera de montaña va tener llugar na madrugada del sábadu.

300 atletes de 16 estaos, escoyíos nun sortéu ente 700 aspirantes, van participar na carrera de montaña más esixente d'Asturies. Trátase de La Travesera, prueba qu'entama'l Grupo de Montaña Ensidesa y la Federación de Montaña del Principáu d'Asturies, que va celebrase dende la 1 de la madrugada con salida d'El Repelao, en Cuadonga, y final n'Arenas.

Los participantes han de percorrer nun tiempu máximu de 21 hores un total de 74 quilómetros per Picos d'Europa, con un desnivel positivu de 6.560 metros. El ganador del añu pasáu foi l'aragonés Manuel Merillas con un tiempu de 10 hores, 41 minutos y 15 segundos, siendo la primer muyer la cántabra Anabel Merino, que completó la carrera en 15 hores, 58 minutos y 3 segundos.

De forma paralela, celébrase tamién La Traveserina, con un percorríu diferente y un nivel menor, anque igualmente duru. Esta carrera sal a les 8.30 hores de Sotres, con final tamién n'Arenas, y cuenta con un llargor de 44 quilómetros y un desnivel de 3.010 metros qu'ha de completase nun máximu de 11 hores.