La Tertulia Pachín de Melás va aldericar sobre'l polémicu borrador de la ordenanza cívica de Xixón

El xixonés Chigre Cantábricu va ser sede esti xueves d’una xornada nueva de la Tertulia Pachín de Melás. Nesta ocasión el tema a tratar ye'l polémicu borrador de la ordenanza cívica de Xixón que quier sacar alantre’l gobiernu municipal de Foro.
 
Pa falar sobre esta normativa que nació col oxetivu de prohibir el botellón na ciudá, pero qu’abarca tamién otros munchos aspeutos de la convivencia ciudadana, Unidá Nacionalista Asturiana (UNA) y el Bloque por Asturies convidaron a Antonio Torres, de l’Asociación contra la Esclusión Alambique y Irene Saavedra, de Xente LGBT Astur (Xega). Tamién va participar na tertulia l’abogada Yolanda Huergo, en representación de Bloque-UNA, pa tratar esta temática en rellación en rellación colos derechos y deberes de la ciudadanía.
 
Na so intervención, Torres va falar sobre la incidencia que tendría la ordenanza ente les persones con más necesidaes y en riesgu d’esclusión social, yá qu’hai que recordar que, pese a la marcha atrás anunciada pol equipu de gobiernu municipal apocayá, ún de los oxetivos de la normativa yera prohibir la mendicidá. Pela so parte, Saavedra va dar una visión de cómo incidiría la propuesta de Foro dende’l puntu de vista de los y les trabayadores del sexu y de la regulación de les rellaciones afeutives nos espacios públicos. L’encargáu de presentar l’alderique, que va celebrase mañana a les 20.30 hores nel Chigre Cantábricu (Muelle del Oriente 3, frente a los Xardinos de la Reina) baxo’l nome de ‘Ordenances antisociales o espacios públicos de llibertá’, ye Daniel Fernández, escritor de dellos artículos sobre’l borrador de la ordenanza cívica de Xixón. La participación na Tertulia Pachín de Melás ta abierta a tolos interesaos.