La Tertulia Pachín de Melás retoma l’actividá con un alderique sobre la situación de Palestina

Miguel Ángel San Miguel y Rafael Palacios, integrantes de la II Flota de la Llibertá, van protagonizar esti martes el primer alderique d’esti cursu de la Tertulia Cultural Pachín de Melás. Los dos activistes van falar de la situación de Palestina.
 
‘Asturies a Gaza: compromisu cola llibertá y los derechos humanos’ ye’l títulu de la charra prevista pa esta tarde, a les 20.30 hores, nel xixonés Chigre Cantábricu, asitiáu frente a los Xardinos de la Reina (cai Muelle del oriente, númberu 3). Xunto a San Miguel y Palacios va tar tamién Xabel García, miembru del Comité de Solidaridá cola Causa Árabe, que va facer de moderador al mesmu tiempu que va falar de la situación de Palestina tres una reciente visita a los territorios ocupaos.
 
Pela so parte, San Miguel va dar la so visión como historiador y va introducir un llinies básiques pa que les persones presentes puedan entender la situación actual del conflictu palestín, y Palacios va falar de la so esperiencia nel viaxe con rumbu a Gaza y de toles situaciones acontencíes en Grecia tres el secuestru del ‘Gernika’ por parte de les autoridaes griegues tres les presiones d’Israel. La entrada pa presenciar toes estes intervenciones, entamaes por Unidá Nacionalista Asturiana (UNA), ye llibre.