La Tertulia Pachín de Melás alderica sobre la evolución del movimientu gai n’Asturies

Esti martes va volver a celebrase una actividá de la Terturlia Pachín de Melás. Nesta ocasión, el títulu del alderique ye ‘Pidimos la Palabra: Igualdá, derechos y condición sexual’ y nella van tomar parte representantes de Xega.
 
L’horariu de comienzu de la tertulia organizada pola agrupación de Xixón d’Unidá Nacionalista Asturiana (UNA) ta previsto a les 20.30 hores nel Chigre Cantábrico (cai Muelle d’Oriente 3), sidrería asitiada cerca de los Xardinos de la Reina. Esta vegada, la Tertulia Pachín de Melás plantega un alderique “sobre la tema de la evolución del movimientu gai n’Asturies nos últimos tiempos”. Asina, va analizase “los sos llogros, fracasos y proyectos pal futuru”. Mané Fernández, coordinador xeneral de Xega, y Tino Burgos, coordinador del grupu d’educación d’esti coleutivu que representa a les lesbianes, gais, transexuales y bisexuales d’Asturies, van tar presentes nel alderique.
 
Dende la formación nacionalista consideren “que l'apueste pola igualdá efectiva de derechos de les persones independientemente de la so orientación sexual, ye una necesidá básica pa cualquier sociedá que quiera autodenominarse democrática, y toa'l discutiniu surdíu alredor del Parque 28 de Xunu (Día del arguyu gai) amuesa qu'inda queda enforma por avanzar nesti campu”.