La tercer dosis de la vacuna alministraráse a los mayores de 70 años

|
Vacuna Comirnaty de Pfizer

Pondríase xunto cola del gripe a partir del día 25. Esti martes rexistráronse 4 casos nuevos.

El preste del llunes de l'Axencia Europea del Medicamentu (EMA, poles sos sigles n'inglés) a la posibilidá de que los mayores de 18 años pueda recibir una tercer dosis de refuerzu de la vacuna Comirnaty de Pfizer/BioNTech llevó a la Comisión de Salú Pública a alcordar la so alministración ente les persones mayores de 70 años. Tamién se tien en cuenta la posibilidá d'ampliala hasta la llende de los 65, siempre que pasaren seis meses dende la segunda dosis.

La puesta entamaría'l día 25 y sería al empar que la del gripe. Amás de la de Pfizer, emplegaríase la de Moderna, pendiente entovía del preste de la EMA, que s'espera pa estos díes.

Nestos momentos yá tán recibiendo n'Asturies la tercer dosis los cerca de 14.000 mayores que viven en residencies y les persones inmunodeprimíes.

Cuartu día ensin finaos

A falta de la espublización de los datos oficiales de la COVID-19, la Conseyería de Salú informó de la detección ayeri de 4 casos nuevos –l'actualización suma 2 más por casos non contabilizaos na xornada previa–. Son 2 menos de los comunicaos el martes.

Fixéronse 2.112 pruebes de diagnósticu d'infeición activa, polo que la tasa de positividá diaria queda nel 0,24 por cientu. A 7 díes esti porcentaxe yera enantes de l'actualización del 0,72 por cientu –ayeri baxó al 0,62 por cientu–.

Nun hai que llamentar muertes per cuartu día siguíu. Siguen 6 pacientes ingresaos na UCI, mentes qu'aumenta en 1, hasta los 13, los hospitalizaos en planta con confirmación o sospecha de COVID-19.

Contador Estadistiques