La tensión pola TV autonómica llega a Madrid

El coordinador xeneral d'Izquierda Xunida Gaspar Llamazares, reclamó ayeri la "llealtá" del gobiernu socialista coles coaliciones que tienen dambos partíosen conceyos y comunidaes autónomes, esixéndo-y un "xiru social" al PSOE y que dexe d'actuar como si tuviere la mayoría absoluta pa qu'IX comprometa'l so votu favorable nos Presupuestos Xenerales del Estáu.

Llamazares acusó al gabinete del presidente Zapatero de llevar alantre una política continuista en munches estayes y pidió un compromisu pa da-yos más financiación a los conceyos, dexando pa la vuelta de les vacaciones en setiembre una reunión ente IX y PSOE a nivel estatal na que Llamazares quier esponé-y a Zapatero toles actuaciones del PSOE en conceyos y autonomíes que dambes fuerces gobiernen en conxuntu y coles qu'IX nun ta d'alcuerdu, ente elles el casu del Conceyu de Córdoba o la manera en que l'executivu asturianu ta llevando alantre la TV autonómica, que va entamar les sos emisiones en prebes precisamente pa eses feches de primeros de setiembre.

D'otra manera, según anuncia'l diariu El Comercio, Izquierda Xunida d'Asturies ta acabante de pidir al PSOE la celebración d'una xunta de les fuerces firmantes del pautu de gobiernu a cuentu de les resquiebres nel pautu pola TV autonómica, una petición que vien poques selmanes dempués de que PSOE y IX-BA celebraren el pasu del ecuador de la llexislatura con un documentu de valoración optimista y que sorrayaba la estabilidá del alcuerdu.