La tasa de positividá diaria baxa del 5 por cientu nuna xornada con 125 casos de COVID-19

Son 15 contaxos más que'l domingu. Uviéu, Gozón y Carreño salen de riesgu estremu y van abrir la movilidá esti miércoles.

A falta de la espublización de los datos oficiales de la COVID-19, la Conseyería de Salú comunicó 125 contaxos ayeri –l'actualización incopora 2 más hasta los 127– nuna xornada na que se fixeron 4.306 pruebes de diagnósticu d'infeición activa, polo que la tasa de positividá foi del 4,62 por cientu, perbaxo del 5 por cientu que marca la Organización Mundial de la Salú (OMS) como llende pa tener controlada la pandemia. A 7 díes, que ye'l datu qu'hai que tener como referente pol ruíu que pue esistir nos datos diarios, el porcentaxe'l domingu yera del 6,12 por cientu –6,06 por cientu ayeri tres l'asoleyamientu de les cifres definitives–.

No que respeuta a los positivos, foron 15 más que na xornada previa, cuando se detectaron 110. L'acumuláu algama yá los 42.715.

Ayeri hebo que llamentar 4 muertes, trés mujeres de 84, 74 y 74 años y un home de 58, de los que nengún vivía en residencia. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.733 persones.

Hai hospitalizaos 360 pacientes con confirmación o sospecha de COVID-19, 28 menos que'l día anterior, mentes que se caltienen 124 ingresos na UCI.

7 conceyos en nivel 4+

L'ameyoramientu de les cifres lleva a la Conseyería de Salú a llevantar el zarru perimetral y les restricciones del nivel d'alerta 4+ n'Uviéu, Gozón y Carreño dende mañana. D'esta forma yá son sólo 7 los conceyos en riesgu estremu: Avilés, Castrillón, Xixón y Piloña –onde les normes entren a valir mañana–, amás de Corvera, Ḷḷena y Ayer, con midíes especiales al tener un nivel de tresmisión del coronavirus SARS-CoV-2 mui altu.

Pa consultar la situación de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, Uviéu dende'l Naranco. Semeya obra d'AdelosRM baxo llicencia CC BY-SA 3.0.