La tasa asturiana de VIH ye ocho puntos mayor que la del Estáu

La directora xeneral de Salú Pública y Participación, Amelia González, anunció esti miércoles qu'ente xineru y ochobre d'esti añu diagnosticóse n'Asturies 93 nuevos casos de VIH, qu'asitien el virus ocho puntos penriba de la media estatal.

La tasa total n’Asturies ye de 87,8 por millón d'habitantes, mientres que la media estatal algama'l 79,3. La mayoría d'infecciones produxéronse per tresmisión sexual.
  
Amelia González fizo públicos estos datos provisionales, en rueda prensa, con motivu del Día Mundial de la Llucha contra'l SIDA, qu'apunten que la incidencia del síndrome d'inmunodeficiencia adquirida nel 2010 reflexa un "enclín a la baxa" en relación coles últimes dos décades, anque "con cierta lentitú".

N'Asturies, son 1.485 les persones que tienen SIDA y los gastos n'antirretrovirales algamen los 14,3 millones.
  
Nesta llinia, declaró que "ye necesario que la cayida seya mayor, que l'enclín s'acentúe más". Por ello, Amelia González calcó nel usu del preservativu, dao que les práctiques sexuales de riesgu apaecen vinculaes al 77,4 por cientu de les infecciones detectaes no que va d'añu, tanto nel casu de los varones que caltienen relaciones homosexuales (42 por cientu), como en práctiques de riesgu heterosexual (35,5 por cientu).
  
González afirmó que'l númberu d'afectaos pol virus VIH, no que va d'añu, ye asemeyáu al 2009, que rexistró 98 infectaos, lo que supunxo una incidencia de 90,4 por millón d'habitantes. Amás, l'añu pasáu detectáronse 28 nuevos casos de SIDA.
  
Xeneros y edá
En cuanto al xéneru, la infección del VIH vien siendo mayor nos varones, con un 80 por cientu y en muyeres el 20 por cientu restante, un enclín que vino repitiéndose nos últimos años.
 
D'otra parte, una novedá na estadística de los últimos dos años ye l'apaición la primer vez d'infecciones en moces d'ente 15 y 19 años. Anque tovía nun pue consolidase como un enclín, González alertó de los cuatro nuevos casos ente adolescentes y calificó esta situación de "preocupante".